Ноғман Мусин иҫтәлегенә әҙәби конкурс еңеүселәре бүләкләнде

Конкурс ике йылдан ашыу барҙы һәм унда 36 автор үҙ эшен тәҡдим итте. Әҙәби нормаларға һәм конкурс талаптарына яуап биргән 20 хикәйә гәзит биттәрендә донъя күрҙе. Нимәһе ҡыҙыҡ: эштәр псевдоним менән бирелде һәм жюри ағзалары эштәрҙе баһалағанда авторҙарҙың кем икәнен белмәне.

Кисә, Яҙыусылар союзының яңыртылған бинаһында еңеүселәрҙе тәбрикләү тантанаһы үтте. Конкурсанттар жюри ағзалары - Әхмәр Үтәбәй, Марат Әминев һәм Айгөл Йәмилеваларҙың баһаларын, кәңәштәрен тыңлап үтте, әҫәрҙәренең яҙылыу тарихын һөйләне. Артабан авторҙарға дипломдар һәм сертификаттар тапшырылды.

1-се урынды детектив жанрындағы "Ҡоҙғон" хикәйәһе менән Рәзинә Зәйнетдинова-Урманшина (псевдонимы - Мыштымбай) яуланы.

2-се урынға "Һуҡыр бейеүсе" хикәйәһе өсөн Борис Мәхмүтов (Йософ) һәм "Уҡытыусым" хикәйәһе менән Әминә Яхина (Айбикә) лайыҡ булды.

3-сө урынды өс автор бүлеште - Зифа Ишмырҙина ("Туҙбаш йылан" хикәйәһе), Фәрзәнә Аҡбулатова ("Иң ҙур хазинам") һәм Рүзидә Үтәшева ("Һөйөү хаҡы").

Тағы ла Фәиз Харрасов - "Тырнаҡ аҫтындағы кер", Нәсимә Ғайсина - "Фани донъя өс көнлөк кенә", Фәрҙиә Юнысова - "Урманда үткән төн", Әлниса Алдырханова - "Бүгәй" хикәйәләре менән дәртләндереү призына лайыҡ булды. Ә Гөлмирә Бикбулатованың "Ҡан тартыуы" хикәйәһе Яҙыусылар союзының махсус бүләген алды.

Конкурста ҡатнашҡан хикәйәләр оҙаҡламай "Йәшлек" гәзитенең сайтында донъя күрәсәк.