Башҡортостан стенды – ПМЭФ форумында иң сағыуҙарының береһе

Был көндәрҙә төньяҡ баш ҡалала 29-сы Петербург халыҡ-ара иҡтисади форумы бара. Тәүге сәғәттәрҙә үк Башҡортостан стенды барыһының да иғтибарын йәлеп итте. Республикабыҙҙың төп инсталляцияһы — яһалма зиһен технологиялары ярҙамында эшләнгән ун метрлыҡ интерактив «Шәжәрә ағасы» форумдың иң сағыу һәм һоҡланғыс экспозицияларының береһе булды, тип иҫәпләй Федерация Советының фән, мәғариф һәм мәҙәниәт буйынса комитеты рәйесе Лилиә Ғүмәрова.

— Быйылғы Петербург халыҡ-ара иҡтисади форумында Башҡортостан Республикаһы майҙансығы – иң сағыу һәм һоҡланғыс майҙансыҡтарҙың береһе. Был шәжәрә ағасы стилендә яһалған күләмле инсталляция. Ағас яһалма зиһен ярҙамында төрлө һорауҙарға яуап бирә: сәнәғәт һәм экспорт потенциалынан алып башҡорт балының төрҙәренә тиклем, – тип яҙҙы сенатор социаль селтәрҙәге сәхифәһендә.  

Башҡортостан стенды — төбәктең киләсәккә ҡарашының символы, тип билдәләне ул.

«Беҙ прогресҡа һәм инновацияларға ынтылабыҙ, әммә шул уҡ ваҡытта тамырҙарыбыҙҙы һәм традицияларыбыҙҙы ҡәҙерләп һаҡлайбыҙ», — тип билдәләне Лилиә Ғүмәрова.

Беҙҙең стендтың үҙәгендә – яһалма зиһен ярҙамында эшләнгән «Шәжәрә ағасы» интерактив инсталляцияһы. Ул төбәктең ҡаҙаныштары, инвесторҙар өсөн өҫтөнлөктәр, Башҡортостандың технологик һәм инновацион ҡеүәте менән таныштыра, республика тураһында һорауҙарға яуап бирә.

Беҙҙең экспозиция ҡунаҡтарын шулай уҡ Башҡортостандың боронғо традицияларҙан алып заманса проекттарға тиклемге тарихы тураһында иммерсив шоу көтә. Стендта теләгән урынды һайлап, республика буйлап сәйәхәт итергә һәм төбәктең матур тәбиғәтен күрергә мөмкин. Шулай уҡ бында республиканың төп проекттары менән танышырға була. Әйтәйек, Евразия ғилми-белем биреү үҙәгенең вуз-ара студенттар кампусы, Рәсәй-Белоруссия инвестиция кластеры, «Росхим» компанияһы проекттары, «Бекабад» технопаркы һәм башҡалар.

"БАШИНФОРМ" МА - https://bash.bashinform.ru/news/economy/2026-06-04/bash-ortostan-stendy-peterburg-haly-ara-i-tisadi-forumynda-i-sa-yu-aryny-bere-e-4656147

Фото: МКRU