Ырыҫлы бишек

12 декабрь Х. Әхмәтов исемендәге Башҡорт дәүләт филармонияның ҙур залында Башҡортостандың Халыҡ ҡоралдары милли оркестры (художество етәксеһе һәм баш дирижеры – Башҡортостандың атҡаҙанған артисы Ринат Мөхәмәтйәнов) сағыу, бай эстәлекле «Ырыҫлы бишек» исемле театрлаштырылған тамаша тәҡдим итә. Милли рух менән һуғарылған был концерт Башҡорт теле көнөнә һәм Ғаилә йылына арнала. Бынан тыш филармония ошо тамаша менән юбилей йылын да йомғаҡлай.

Бәпес туйы, Исем ҡушыу, Йәштәр туйы, Килен төшөрөү кеүек борондан һаҡланып килгән тарихи йолалар нигеҙендә төҙөлгән театрлаштырылған тамашала филармонияның танылған солистары, билдәле коллективтары ҡатнаша. Был көндө артистар сәхнәлә йырлап ҡына ҡалмаясаҡ, ә бар актерлыҡ һәләттәрен дә күрһәтәсәк.

Милләтебеҙҙең «ырыҫлы бишеге» менән тығыҙ бәйләнгән ғөрөф — ғәҙәттәрҙе, йолаларҙы хәтерҙә тотайыҡ, йәш быуындарға ҡәҙерләп тапшырайыҡ, телебеҙ ҡәҙерен беләйек, тип янып йәшәүсе һәр кем һис шикһеҙ был концертты күрергә тейеш!

Концерттың режиссеры, проект авторы Башҡортостандың атҡаҙанған сәнғәт эшмәкәре Сулпан Асҡарова, сценарий авторы Башҡортостандың атҡаҙанған мәҙәниәт хеҙмәткәре Әлфиә Ғимаҙиева.

«Ырыҫлы бишек» – ул тыуған башҡорт телебеҙ. «Ырыҫлы бишек» – ул татыу, берҙәм, бәхетле ғаилә. «Ырыҫлы бишек» – халҡыбыҙҙың бай рухи хазинаһы булған халыҡ йолалары. «Ырыҫлы бишек» – милли рухлы халыҡ йырҙары, ҡурай моңо, ҡумыҙ сыңына тоғро ҡалған филармониябыҙ.

Башҡорт халҡының быуаттарҙан килгән изге йолаларын юғалтмайыҡ, һаҡлайыҡ, бергәләп иҫкә төшөрәйек, хөрмәтле милләттәштәр! Килегеҙ, көтәбеҙ!

 ХАЛҠЫБЫҘ ЙОЛАЛАРЫН ҠӘҘЕРЛӘП ҺАҠЛАЙЫҠ!