«Халыҡтар дуҫлығы тауышы»

2024 йылдың 27 ноябрендә Башҡорт дәүләт опера һәм балет театрында «Халыҡтар дуҫлығы тауышы» музыкаль фестивале сиктәрендә академик вокал концерты була. Ул Өфөлә барған Рәсәй менән Ҡаҙағстандың XX төбәк-ара хеҙмәттәшлек Форумына арнала.
Концертты музыкаль оҙатыу өсөн дирижер, Башҡортостан Республикаһының халыҡ артисы, «Алтын битлек» Рәсәй милли театр Премияһы лауреаты Артем Макаров етәкселегендәге башҡорт опера симфоник оркестры яуаплы.
Театр сәхнәһендә: Рәсәйҙең атҡаҙанған, Башҡортостандың халыҡ артисы, Мария театры солисы Асҡар Абдразаҡов; Башҡортостандың атҡаҙанған артисы, Мәскәүҙең «Геликон-опера» музыкаль театры солисы, халыҡ-ара конкурстар лауреаты Игорь Морозов; Башҡорт дәүләт академия опера һәм балет театры солисы, Халыҡ-ара, Бөтә Рәсәй һәм республика конкурстары лауреаты Иҙел Аралбаев; Бөтә Рәсәй һәм республика конкурстары лауреаты Лилиә Халиҡова, Башҡортостандың халыҡ артисы, халыҡ-ара һәм Бөтә Рәсәй конкурстары лауреаты Әлфиә Кәримова; Ҙур һәм Мария театрҙары солисы Антонина Весенина; Ҡаҙағстандың атҡаҙанған эшмәкәре, «Аstana opera» (сопрано) операһының төп солисы Жупар Ғабдуллина һәм Ҡаҙағстандың атҡаҙанған эшмәкәре, Меир Байнеш ҡатнаша.
Концертты Рәсәйҙең халыҡ артисы, Рәсәй Федерацияһының Дәүләт премияһы лауреаты, балерина, театр һәм кино актрисаһы Илзе Лиепа алып бара.
Асҡар Абдразаҡов ни өсөн музыкаль фестивалде Рәсәй һәм Ҡаҙағстан форумы көндәрендә үткәрергә ҡарар итеүҙәре хаҡында һөйләне: "Халыҡтар дуҫлығы тауышы" халыҡты берләштергән мәҙәниәттең бөйөк ижади көсөн тағы бер тапҡыр һыҙыҡ өҫтөнә ала, - тип билдәләне ул. - Халыҡтарыбыҙ араһында быуаттар аша үткәрелгән дуҫлыҡ һәм яҡшы күршелек традициялары мәҙәниәттәр араһында һөйләшеп-аңлашыу өсөн ишектәр аса, ниәттәр һәм йолалар менән уртаҡлашырға мөмкинлек бирә. Был һәр милләттең милли үҙенсәлеген байытырға ярҙам итә һәм мәҙәниәтебеҙҙең төрлөлөгөн сағылдыра. Моң, музыка теле һәр беребеҙгә яҡын һәм аңлайышлы, ваҡыт һәм аралар аша беҙҙе яҡынайта."
Артист форумда һәм фестивалдә ҡатнашыусыларға уңыштар һәм ижадта сәскә атыуҙарын теләне.