ҺИНДОСТАНДА — БАШҠОРТ ФИЛЬМЫ

Башҡорт кинематографы Һиндостанда халыҡ-ара фестивалдә күрһәтеләсәк. 24-27 октябрҙә һиндостандың Тривандрум ҡалаһында «Рус йөрәге тураһында һүҙ» халыҡ-ара фестивале үтәсәк, унда Рәсәй һәм Һиндостан төбәктәре бер-береһенә үҙҙәренең мәҙәни традицияларын тәҡдим итәсәк. Фестиваль эшенең бер йүнәлеше киноиндустрияға арнала.

Фестивалде ойоштороусылар Рәсәй Кинематографистар союзы ағзаһы, Башҡортостан Кинематографистар союзы идараһы ағзаһы Марат Фәйзуллинды Башҡортостан Республикаһы исеменән сығыш яһарға саҡырҙы. Ул стратегик сессиялар һәм пленар ултырыштар эшендә ҡатнашасаҡ, башҡорт киноһы, бөгөн башҡорт кинематографистарын һәм тамашасыларын ниндәй темалар борсоуы хаҡында һөйләйәсәк.

Фестиваль эшенең бөтә көндәрендә лә Рәсәй төбәктәре фильмдары күрһәтеләсәк. Башҡорт кинематографы яҡташыбыҙ, режиссер Айнур Асҡаровтың «Еңмеш» фильмын тәҡдим итәсәк.

Кинематографистар союзында аңлатыуҙарынса, фильм осраҡлы һайланмаған. Ваҡиғалар ҙур булмаған башҡорт ауылында бара, уның әкрен тормошо «Танцор диско» популяр һинд фильмының пленкаһын алып килеү менән боҙолоп китә. Бөтә урындағы балалар киносеансҡа эләгеү тураһында хыяллана. Улар араһында Илнур исемле шаян малай, үҙенең иҫәпһеҙ-һанһыҙ ҡылыҡтары менән өләсәһен йонсота. Әммә кино өсөн малай бер көнгә тыңлаусанлыҡ өлгөһө булырға әҙер.

РАЯН АТАНБАЕВ.

https://ataisal.com/articles/godpoleznihdel/2024-10-24/indostanda-bash-ort-filmy-3981465?utm_source=vk&utm_medium=social&utm_campaign=39548826