Һандыҡ тапшырыу йолаһы

Мәскәүҙә «Рәсәй» халыҡ-ара күргәҙмәһе сиктәрендә үткән «Туғандар-Яратҡандар» Бөтә Рәсәй форумында ҡомартҡылар менән һандыҡ тапшырыу йолаһы тәҡдим ителде. Өфө районынан Мәхмүтовтар ғаиләһе һандыҡҡа эйә булды.

Мәхмүтовтар ғаиләһендә өс бала үҫеп килә: Ильясҡа - 10, Арыҫланға - 8, Аселгә – 4 йәш. Уларға бала саҡтан уҡ бер-береһенә, яҡындарына, Ватанға, хеҙмәткә, үҙ йолаларына һөйөү һәм хөрмәт тәрбиәләнә. Ғаилә күп тапҡырҙар һәм ҙур уңыш менән төрлө конкурстарҙа һәм проекттарҙа ҡатнаша. Улар «Йыл ғаиләһе» конкурсының төбәк һәм федераль этаптарында еңеүселәр, «Был беҙҙә ғаилә» конкурсының дистанцион этабында, профессиональ династиялар конкурсында ҡатнашыусылар, Шулай уҡ Башҡортостан Республикаһында «Ғаилә – тыныслыҡ нигеҙе» проектында ҡатнашыусылар.

Һандыҡ эсендә ҡулдан эшләнгән әйберҙәр бар, улар ғаилә ҡиммәттәре булараҡ ата-әсәләрҙән балаларға тапшырыла. Ғаиләгә - шәжәрә китабы, ә ғаилә башлығы Илнур Зөфәр улына «таҫтамал» тапшырылды. Ҡатыны – Лилиә Әхәт ҡыҙы тыуған яғыбыҙҙың күңел йылыһын һаҡлаған башҡорт шәлен алды. Улдарына кисеттәр тапшырылды, был традицион атрибут ир-егеттәргә Ватанды яҡлау походтарына киткәнсе тапшырыла. Һандыҡты ҡыҙы, бәләкәй Асель ала. Халыҡ ижады аҙналығында һандыҡты тапшырыу йолаһы ихлас изгелек, ғаилә уңайлылығы, мәҙәниәттәр һәм быуындарҙың күсәгилешлеге символына әүерелә.

Башҡортостандың халыҡ сәсәне, М.Аҡмулла исемендәге Башҡорт дәүләт педагогия университетының Башҡорт фольклоры ғилми-тикшеренеү үҙәге етәксеһе, филология фәндәре докторы Розалиә Солтангәрәева күргәҙмәгә килеүселәр менән башҡорт ғаилә йолалары тураһында белемдәре менән уртаҡлашты.

"Һәр халыҡ үҙ ижадын булдыра, изгелек һәм аҡыл эйәһе булып тора. Ул үҙенең идеологияһын меңәр йылдар буйы һаҡланған мәҙәниәт аша белдерә. Бөтә мифологияларҙа һандыҡ һәр ваҡыт ғаилә генә түгел, ә бөтә халыҡтың хәтерен, мәҙәниәтен һәм йолаларын һаҡлауҙы символлаштыра. Күп халыҡтарҙың фольклорында һандыҡ һәр ваҡыт ыңғай символика йөрөтә. Туйҙа киленгә һандыҡ тапшырыу – ике ғаиләне берләштергән йола, мәҙәни мираҫты тапшырыу һәм киләһе быуын алдында яуаплылыҡ символы", - тип һөйләне Розалиә Әсфәндиәр ҡыҙы.

https://www.bashinform.ru/news/culture/2024-01-21/v-moskve-na-forume-rodnye-lyubimye-semie-mahmutovyh-iz-bashkirii-podarili-sunduk-3611630