Дүртөйлөлә бик  матур  сара үтә

Ошо ял көндәрендә Дүртөйлөлә бик  матур  сара үтә.   Беҙҙең ҡунаҡсыл ерҙә йәнә - «Туған тел» татар йырын башҡарыусылар конкурсы. Быйыл музыкаль форумда яңғыҙ башҡарыусылар ҙа, вокаль коллективтар ҙа ҡатнаша. Конкурстың географияһы ғәҙәттәгесә бик киң. Ҡатнашыусылар араһында Башҡортостан Республикаһы, Татарстан, Ырымбур һәм Һарытау өлкәләре вәкилдәре бар. Ойоштороу комитеты 67 ғариза ҡабул иткән. Бөгөн иртән конкурс эштәрен ҡараныҡ. Ҡатнашыусыларҙы почетлы, компетентлы жюри баһалай, уның составында сәнғәт белгестәре, вокал сәнғәте профессорҙары, халыҡ һәм атҡаҙанған артистар, композиторҙар бар. Беҙ татар музыкаһының ғәжәйеп донъяһына сумдыҡ, ижад атмосфераһын тойҙоҡ, бер һүҙ менән әйткәндә, ысын сәнғәттән ләззәт алдыҡ.

Һәм был ғына түгел, фестивалде ойоштороусылар конкурсанттар өсөн иҫ киткес бүләк әҙерләгән. Профессионалдар музыканттар татар йырын башҡарыу үҙенсәлектәре буйынса түңәрәк өҫтәл һәм оҫталыҡ дәресе үткәрә. Ә алда иң тулҡынландырғыс-бүләкләү тантанаһы һәм еңеүселәрҙең йомғаҡлау концерты! Һеҙҙе, дуҫтар, иртәгә, 12 ноябрҙә, Дүртөйлө ҡалаһының район мәҙәниәт йортонда үтәсәк гала-концертта көтәбеҙ.

Риф Йосопов.