"Асанай"ҙар еңеүсе

Стәрлетамаҡта ике көнлөк VI «Ашҡаҙар таңдары» Республика башҡорт фольклоры байрамы тамамланды. Быйыл сарала Әбйәлил, Әлшәй, Архангел, Баймаҡ, Бәләбәй, Белорет, Бөрйән, Ғафури, Ейәнсура, Иглин, Ишембай, Күгәрсен, Мәсетле, Миәкә, Стәрлебаш, Стәрлетамаҡ, Хәйбулла райондарынан, Стәрлетамаҡ, Сибай ҡалаларынан, Ырымбур өлкәһенән 24 фольклор коллективы вәкилдәре ҡатнашты.

Ҡала мәҙәниәт һарайы сәхнәһендә ансамблдәр фольклорҙың төрлө жанрҙарын (һүҙ, йыр, бейеү, инструменталь йолалар, халыҡ йолалары, халыҡ уйындары, ярыштар, шаяртыуҙар, кәсептәр) тәҡдим итә. Ә фойела «Башҡорт халҡының мәҙәни мираҫы» тематик күргәҙмә-һатыу эшләне.

Фестивалде ябыу тантанаһында ҡунаҡтарҙы һәм унда ҡатнашыусыларҙы Республика халыҡ ижады үҙәгенең генераль директоры Салауат Кирәев сәләмләне.

Конкурс программаһын ҡарағандан һуң жюри ағзалары Башҡортостандың атҡаҙанған халыҡ ижады коллективын, «Асанай» халыҡ фольклор ансамблен (Ғафури районы) иң яҡшыһы тип таныны. 16 йәшкә тиклемгеләр араһында - «Аҡ тирмә» өлгөлө башҡорт фольклор коллективы (Иглин районы), 16 йәштән өлкәндәр араһында «Йөрәктау» Халыҡ фольклор ансамбле (Башҡортостан Республикаһының Стәрлетамаҡ ҡалаһы) I дәрәжә лауреат исеменә лайыҡ булды.

Шулай уҡ «Оҙон ҡол» - өлгөлө «Аҡ тирмә» башҡорт фольклор коллективы (Иглин районы), «Иң яҡшы традицион башҡорт халыҡ ҡатын - ҡыҙ кейеме» - «Ҡош юлы» башҡорт халыҡ фольклор коллективы (Хәйбулла районы) номинацияларында халыҡ кейемдәре тегеү һәм башҡорт биҙәүестәре эшләү оҫталары билдәләнде.

Гала-концерт – фестивалдең сағыу тамамланыуы булып тора. Бында байрамдың иң сағыу, иң яҡшы коллективтары сығыш яһаны. Уларҙың һәр береһе урындағы фольклорҙы, халыҡ мәҙәниәте үҙенсәлектәрен, үҙ төбәгенең көнкүрешен күрһәтте. Кисәне Стәрлетамаҡ дәүләт театр-концерт берекмәһенең профессиональ артистарының сығыштары биҙәне.

Фестиваль сиктәрендә фольклор коллективтары етәкселәре өсөн семинар ойошторолдо. Жюри рәйесе, филология фәндәре докторы, М.Аҡмулла исемендәге Башҡорт дәүләт педагогия университетының башҡорт фольклоры ғилми-тикшеренеү үҙәге етәксеһе, Ҡырғыҙ Республикаһы «Манас» милли академияһының Почетлы академигы, С.Байышева (Ҡаҙағстан), Салауат Юлаев Ордены кавалеры, Халыҡ сәсәне, Бөтә Рәсәй һәм халыҡ-ара конкурстар лауреаты Розалиә Солтангәрәева фольклор жанрҙарын инсценировкалау принциптары һәм фольклор-йола постановкаларының режиссураһы тураһында сығыш яһаны. Рәсәй Федерацияһының һәм Башҡортостан Республикаһының атҡаҙанған сәнғәт эшмәкәре, Башҡортостан Республикаһының Халыҡ артисы, Салауат Юлаев исемендәге дәүләт премияһы лауреаты, халыҡ-ара төрки донъяһы премияһы лауреаты, Өфө сәнғәт училищеһы уҡытыусыһы, композитор Нур Дауытов, филология фәндәре докторы, М.Аҡмулла исемендәге Башҡорт дәүләт педагогия университетының Башҡорт фольклоры ғилми-тикшеренеү үҙәгенең баш ғилми хеҙмәткәре Нәркәс Хөббөтдинова йолаларҙың һәм ғөрөф-ғәҙәттәрҙең төп төшөнсәләре, фольклор-йола постановкаларының музыкаль оҙатыуы хаҡында һөйләне.

Хәтерегеҙгә төшөрәбеҙ, «Ашҡаҙар таңдары» Республика башҡорт фольклоры байрамы 2006 йылдан уҙғарыла һәм йолаға әүерелде. Быйыл ул алтынсы тапҡыр ойошторолдо. Проект Башҡортостан Республикаһының бренд саралары исемлегенә индерелгән һәм башҡорт фольклорын һаҡлауға, үҫтереүгә һәм пропагандалауға, иң яҡшы аутентик, этнографик башҡорт фольклор коллективтарын һәм башҡарыусыларын асыҡлауға йүнәлтелгән.

Сараны ойоштороусылар: Башҡортостан Республикаһының Мәҙәниәт министрлығы, Республика халыҡ ижады үҙәге, Башҡортостан Республикаһының Стәрлетамаҡ ҡалаһы ҡала округы хакимиәте.

https://kulturarb.ru/ru/news/narodnyj-folklornyj-ansambl-asanaj-gafurijskogo-rajona-stal-pobeditelem-respublikanskogo-prazdnika-ash%D2%A1a%D2%99ar-ta%D2%A3dary