«Башҡорт аты» фестиваленә сит илдәрҙән йылҡысылыҡ буйынса белгестәр килә

Хөкүмәттең аҙналыҡ оператив кәңәшмәһендә Радий Хәбиров 11-13 августа Баймаҡ районында башҡорт тоҡомло аттарҙың «Башҡорт аты» халыҡ-ара фестивале ойошторолоуын хәбәр итте. Уның һүҙҙәренсә, Татарстан, Тыва, Чечня, Дағстан, Ҡаҙағстан, Төркиә, Азербайжан, Берләшкән Ғәрәп Әмирлектәренән йылҡысылыҡ буйынса белгестәр килә. Урал аръығы хакимиәттәре башлыҡтарына халыҡ-ара сараға әҙерлекте әүҙемләштереү бурысы йөкмәтелгән.

«Урал аръяғы райондарының хакимиәт башлыҡтарынан ошо фестивалдә әүҙем ҡатнашыуҙарын һорайым. Һыбайлыларҙың костюмлаштырылған төркөмөн әҙерләгеҙ. Асылда, был Баймаҡтың ғына түгел, ә тотош Урал аръяғы фестивале», - тине Радий Хәбиров.

«Башинформ» хәбәр иткәнсә, фестивалдең мәҙәни-спорт программаһында «Ылаҡ», «Тай-тулаҡ», уҡтан атыу һәм башҡа ярыштар ойошторола. Ә аттар парадында Башҡортостан райондарынан 350 һыбайлы ҡатнаша. «Башҡорт аты» ҡунаҡтары өсөн «Оҫталар ҡалаһы», милли ризыҡтар фудкорты, «Ҡымыҙфест» фестивале һәм «Башҡортостан аҙыҡ-түлеге» проекты дипломанттарының сауҙа майҙансығы эшләй.

Хәтерегеҙгә төшөрәбеҙ, беренсе фестиваль былтыр июль аҙағында Баймаҡ районы биләмәһендә уҙғайны.

https://www.bashinform.ru/news/social/2023-07-03/na-festivale-bash-ort-aty-v-bashkiriyu-priedut-spetsialisty-po-konevodstvu-iz-zarubezhnyh-stran-3325111