Башҡортостан сәсәндәре Бөтә донъя сәсәндәр форумында ҡатнашты

Ҡырғыҙ Республикаһы Президенты исеменән Дәүләт секретары Суйунбек Ҡасмәмбәтов сәләмләне, Ҡырғыҙ Республикаһының мәҙәниәт, мәғлүмәт, спорт һәм йәштәр сәйәсәте Министрлығынан, шулай уҡ Ҡырғыҙ Республикаһында Рәсәй, Монголия һәм Үзбәкстан илселектәре вәкилдәренән изге теләктәр яңғыраны. Башҡортостандан форумға башҡорт фольклоры үҙәге етәксеһе, М.Аҡмулла исемендәге Башҡорт дәүләт педагогия университетының филология фәндәре докторы, халыҡ сәсәне Розалиә Солтангәрәева, Республика халыҡ ижады үҙәгенең генераль директоры урынбаҫары, «Башҡортостан Республикаһы сәсәндәр үҙәге» автономиялы коммерцияға ҡарамаған ойошманың фольклорҙы үҫтереү буйынса директоры Нәфисә Тулыбаева (докладтың темаһы “Сәсәндәр традициялары. Башҡортостан Республикаһы сәсәндәр мәктәбе”) саҡырылды. Форумдың Пленар өлөшөндә Розалиә Солтангәрәева М. Аҡмулла исемендәге Башҡорт дәүләт педагогия университетының ректоры С.Т.Сәғитовтың сәләмләү хатын уҡып ишеттерҙе һәм "Сәсән һәм уның цивилизациялағы роле" доклады менән сығыш яһаны. Ҡатнашыусыларҙың доклад тезистары һәм сәсәндәрҙең биографияһы «Беренсе Бөтә донъя сәсәндәр форумы» материалдарында баҫылған. Форумда ҡатнашыусыларҙың барыһына ла сертификаттар тапшырылды. Форум йәмғиәттең рухи-әхлаҡи тормошонда һәм донъя киңлегендә уникаль һәм әһәмиәтле, сөнки унда тәүге тапҡыр ғалимдар ҙа, сәсәндәр ҙә ҡатнаша, асыҡ майҙансыҡтар, диалогтар, "Ғалим, сәсән, халыҡ" дискуссиялары, эпик риүәйәттәр менән сығыштар үткәрелә. Бындай форматта үткәрелгән форум, резолюцияла билдәләнгәнсә, эпос ғилемен һәм дөйөм алғанда, халыҡтарҙың сәсәнлек традицияларын алға ебәреүҙә, позициялаштырыуҙа ҙур әһәмиәткә һәм ролгә эйә. Форум программаһына Пленар ултырыш; Тематик сессиялар; Бишкек ҡалаһының милли тарихи музейында, Ҡаракүл ҡалаһында һәм «Толпар таш» аҡланында сәсәндәрҙең сығышы; Ҡырғыҙ эпосының төп геройы "Манас" тыуған урынға барыу һәм Жырғалы ауылы янындағы тауҙа ат бәйләгес ҡуйыу инә.

Форумдың үҙәк өлөшө булып «Халыҡ-ара сәсәндәр һәм эпосоветтар ойошмаһын» булдырыу тураһында килешеүгә ҡул ҡуйыу тора, ул традицион эпик мәҙәниәтте һаҡлау һәм популярлаштырыу мәсьәләһендә ҡыҙыҡһынған кешеләрҙең көстәрен берләштереүгә булышлыҡ итәсәк. Форум сиктәрендә шулай уҡ күңелле ваҡиға – Ҡырғыҙ Республикаһы "Манас" Милли Академияһының почетлы академигы дипломдарын тапшырыу үтте. Уларҙы Академия Президенты, филология фәндәре докторы, манасчи (әкиәтсе) Талантаалы Алымбекович Бакчиев тантаналы рәүештә тапшырҙы. Фәндә, эпос ғилемендә күп йыллыҡ хеҙмәте һәм сәсәндәр сәнғәтен тергеҙеүгә, популярлаштырыуға ҙур шәхси өлөшө өсөн халыҡ сәсәне Розалиә Әсфәндиәр ҡыҙы Солтангәрәеваға Ҡырғыҙ Республикаһы Манас милли академияһының почетлы Академигы исеме бирелде. Билдәле ғалим-фольклорсыны һәм сәсәнде ихлас ҡотлайбыҙ. Ныҡлы һаулыҡ һәм оҙон ғүмер, ижади, тикшеренеү уңыштары һәм сәсәнлек һәләтен үҫтереү теләйбеҙ! Почетлы исемдәргә шулай уҡ: Садалова Тамара Михайловна, филология фәндәре докторы, Алтай Республикаһында ЮНЕСКО эштәре буйынса милли комитеттың яуаплы секретары; Хакасск тел, әҙәбиәт һәм тарих ғилми-тикшеренеү институты директоры, филология фәндәре кандидаты Майнагашева Нина Семеновна лайыҡ булды.

https://kulturarb.ru/ru/news/bashkirskie-seseny-uchastvovali-vo-vsemirnom-forume-skazitelej-v-bishkeke