Программаға Совет һалдаттарының Бөйөк ватан һуғышы йылдарындағы ҡаһарманлығы тураһында популяр йырҙар, тыуған илгә, уның данлы тарихына ихлас һөйөү менән һуғарылған хәрби-патриотик композициялар ингән.
"Беҙҙең яңы проект легендар 112-се Башҡорт кавалерия дивизияһы иҫтәлегенә арнала. Уның һыбайлылары Ватан өсөн фиҙаҡәр һуғышҡан, фашистарҙы дер ҡалтыратҡан. Дивизияның данлы яугирҙәре һәм уның командиры, Рәсәй Геройы Миңлеғәле Шайморатовтың батырлыҡтары – үлемһеҙ! Яңы программа көҙгөһөн күрһәтелгән “Рәсәй – Тыуған илем!" концертының логик дауамы булып тора. Әгәр ул саҡта Ер-Әсә образын данлаһаҡ, хәҙер уның улдары – яҡлаусылары тураһында һөйләрбеҙ",- тине филармонияның художество етәксеһе, Башҡортостандың халыҡ артисы Айбулат Рәхмәтуллин.
Сценарий авторы – Башҡортостандың атҡаҙанған мәҙәниәт хеҙмәткәре Динара Ҡәйүмова Миңлеғәле Шайморатовтың образын ҡаһарман яугир итеп кенә түгел, матур күңелле кеше, хәстәрлекле атай булараҡ та һынландырыуҙы маҡсат итеп ҡуйған.
"Төп идея – батыр булып тыумайҙар, ә тырышлыҡ һәм матур сифаттар арҡаһында батыр булып китәләр, тигән хәҡиҡәтте йәш тамашасыға еткереү. Сценарийға генерал Шайморатовтың бала сағы тураһында күренештәр инде, ул яп-ябай ауыл малайы була, тик, күп тиҫтерҙәренән айырмалы, маҡсаттарына нығыраҡ ынтыла. Геройҙың ҡыҙы Октябрина менән диалогтарында уның кешелек сифаттары асыла», - тип һөйләне «Башҡортостандың мәҙәни донъяһына» Динара Ҡәйүмова.
Яңы программа өсөн филармония коллективы репертуарға ике башҡорт халыҡ йырын индергән – оркестр оҙатыуында һәм Башҡортостан Республикаһының атҡаҙанған артисы Иршат Ҡарасурин башҡарыуында "Һалдат йыры" һәм ир-егеттәр составы башҡарыуында«Суҡан батыр» йыры.
Концерттың ҡуйыусы режиссеры – Башҡортостандың атҡаҙанған артисы Фирғәт Ғарипов.
Билеттар кассала һәм сайтта https://ufa.kassy.ru/venue/gaukii-neftekamskaya-gosudarstvennaya-filarmoniya-55/80/.
Пушкин картаһы ғәмәлдә.