"Наурыҙ" - күп халыҡтарҙың боронғо календарь байрамдарының береһе.

27 мартта Өфөлә «Наурыҙ» - яҙғы көн менән төндөң тигеҙлеге байрамын билдәләйҙәр. Байрам көндөҙгө сәғәт 12-лә «ЕврАзия» агропаркы майҙанында башлана. Адресы: Халыҡтар дуҫлығы проспекты, 21.

Байрам ҡунаҡтары республика территорияһында йәшәүсе халыҡтар менән яҡынданыраҡ таныша аласаҡ. Башҡорттар, татарҙар, тажиктар, үзбәктәр, төркмәндәр, әзербайжандар, дағстандар, ҡаҙаҡтар милли мәҙәниәтен күрһәтәсәк. Улар милли ихаталар-тирмәләр ҡора. Һәр ихатала милли аш-һыуҙан торған өҫтәлдәр урынлаштырыласаҡ. Теләгән һәр кемде байрамдың төп ризыҡтарының береһе - былау менән һыйлайҙар.

Ҡунаҡтарҙың спорт уйындарында һәм ярыштарҙа ҡатнашыу мөмкинлеге бар. Мауыҡтырғыс ярыштар «Батырфест» милләт-ара фестивале барышында Башҡортостан Республикаһының Халыҡтар дуҫлығы йорто кубогына уҙғарыла. Сарала ҡатнашыусылар мас-рестлингта, уҡтан атыуҙа, суҡмар ташлауҙа, таштарҙы махсус подиумға күтәреүҙә һәм башҡа дисциплиналарҙа көс һынаша.

Фестивалдең йәш ҡунаҡтары өсөн милли уйындар ойошторола. Әүҙем ҡатнашыусыларҙы бүләктәр көтә. Шулай уҡ төрлө халыҡтарҙың милли йыр-бейеүҙәренән торған байрам концерты була. Башҡортостанда йәшәгән халыҡтарҙың бөтә милли-мәҙәни берләшмәләре үҙҙәренең программаһын әҙерләй.

Сараны ойоштороусылар - Башҡортостан Республикаһының Мәҙәниәт министрлығы, Өфө ҡалаһының Ленин районы хакимиәте, Республика халыҡтары ассамблеяһы, Халыҡтар дуҫлығы йорто һәм республиканың милли-мәҙәни йәмәғәт ойошмалары.

     https://www.bashinform.ru/