Өфөлә өс көнгә иҫәпләнгән «Сөләймәнов көндәре» башланды.

Студенттар «Урал батыр» эпосын тасуири һөйләп кенә ҡалмай, образға ла инә. Күҙ алдына килтереп башҡарғанда ғына башҡорт халыҡ мираҫы нескәлегенә төшөнөргә була, ти улар.

Сараның тап фольклорға нигеҙләнеп ойошторолоуы осраҡлы түгел. Уның артында күренекле ғалим Әхмәт Сөләймәновтың оло хеҙмәте ярылып ята. «Сөләймәнов көндәре» лә фольклорсының тыуған көнө уңайынан ойошторолдо. Осрашыуҙың тәүге көнөндә Әхмәт Мөхәмәтвәли улының тормош һәм ижад юлына байҡау яһалды.

Башҡорт халыҡ ижадын өйрәнеүгә, уны киң тамашасыға еткергән ҙур эштәре айырым баһаланды. Әхмәт Мөхәмәтвәли улы 400-ҙән ашыу ғилми хеҙмәт, шул иҫәптән 30-ҙан ашыу монография, мәктәп һәм юғары уҡыу йорттарына дүрт тиҫтәләп уҡыу әсбабы авторы. Тап ул әкиәт жанрын фәнни күҙлектән тикшереүгә өлгәшә.

Бөгөн Әхмәт Сөләймәновтың фәнни хеҙмәтен үҫеп килеүсе быуын өйрәнә. Уның эштәре нигеҙендә ойошторолған ғилми конференция, махсус уҡыуҙар ошо хаҡта һөйләй. «Сөләймәнов көндәре»ндә лә төрлө осрашыуҙар, түңәрәк өҫтәл, ғалимдың уҡыусылары менән фекер алышыуҙар көтөлә.

     Азат Ғәлиуллин

     https://bash.news/bash