+1 °С
Болотло
Бөтә яңылыҡтар
10
Новости
2 Февраль 2021, 13:00
Йәмәғәтселек Яныбай Хамматовҡа Башҡортостандың халыҡ яҙыусыһы исемен биреүҙе күтәреп сыҡты
Әле интернет киңлектәрендә ҡултамғалар йыйыла.
Әле интернет киңлектәрендә ҡултамғалар йыйыла. Яныбай Хамматов башҡорт әҙәбиәте тарихында тәүге пенталогия ижад итеүсе булараҡ билдәле. Ул егермегә яҡын роман, тиҫтәләгән повесть-хикәйәләр авторы. Тап уның әҫәре нигеҙендә беренсе башҡорт телевизион фильмы төшөрөлә.
«Бөртөкләп йыйыла алтын», «Аҡман-тоҡман», «Төньяҡ Амурҙары» кеүек күләмле әҫәрҙәре аша халыҡ күңелен яулаған башҡорт әҙибе Белорет районының Исмаҡай ауылында донъяға килә. 15 йәшенән Үрге Әүжән алтын приискаһында эшләй. Бөйөк Ватан һуғышында ҡатнаша. 1956 йылда хәҙерге Башҡорт дәүләт университетын тамамлай. Яҙыусының тәүге хикәйә, мәҡәләләре башҡорт старателдәре тормошона арналған. Ә инде романдары Яныбай Хамматовты яҙыусы итеп таныта. «Бөртөкләп йыйыла алтын» пенталогияһы хатта, кинорежиссер Әмир Абдразаҡов тарафынан фильм итеп үҫтерелә.
Башҡорт әҙибе халыҡ хәтерендә, әҙәбиәт донъяһында мәңгелеккә уйылған. Бөгөн уның исемен хаҡлы рәүештә гимназия, мәктәп, ҡала һәм ауыл урамдары йөрөтә. Тыуған яғының Почетлы гражданины ла. Тик башҡорт әҙәбиәте үҫешенә тос өлөш индергән шәхестең ижады ваҡытында баһаланып та, лайыҡлы исем алыуға өлгәшмәүе генә йәмәғәтселектә ҙур һорау тыуҙыра.
Тарихи ғәҙеллек урынлаштарыу йәһәтенән журналист Баныу Ҡаһарманова ҡултамғалар йыйыуҙы башлап ебәрҙе.
Бөгөн петиция төрлө социаль селтәрҙәрҙе ялмап алған. Әлегә 200-ҙән ашыу электрон ҡултамға йыйылған. Йәмәғәтселек халыҡ һөйөүен яулаған әҙипкә Башҡортостандың халыҡ яҙыусыһы исемен биреү яҡлы. Был изге маҡсатты Яҙыусылар Союзы ла күтәреп алырына ышана.
Азат Ғәлиуллин
Читайте нас: