«Берҙәмлек ауазы»

"Тәүҙә был проекттың башланғысы Беҙгә Рәсәй Федерацияһының Мәҙәниәт министрлығынан килде. Өфө уҙғарыу урыны итеп һайланды, сөнки ҡалала ошондай күләмдәге сараларҙы тормошҡа ашырыу буйынса ҙур тәжрибә бар. Мәҫәлән, 2021 йылда Республиканың баш ҡалаһында VI Бөтә донъя Фольклориадаһы үтте. Был донъяның 37 иленән делегациялар ҡатнашҡан иң ҙур фестиваль булды», - тип һөйләне Башҡортостан Республикаһы Мәҙәниәт министры урынбаҫары Ринат Ғайсин.

AY YOLA төркөмө Өфөлә «Берҙәмлек ауазы» шоуының хедлайнеры булып сығыш яһай. Проектта популяр артистар Олена УУТАй, Zventa Sventana, Ника Дубик, Добрыня Сатин һәм «Тодош» төркөмө, Вахтанг, «Братство Атома» һәм башҡа артистар ҡатнаша.

Күләмле «Берҙәмлек ауазы» шоуы 15 майҙа «Өфө-Арена» сәхнәһендә була. Был ғәҙәти форматтағы концерт түгел, ә иммерсив шоу. Был концерт ҡына түгел, ә сағыу махсус эффекттарҙы үҙ эсенә алған ысын тамаша. Ул тамашасыларға күп милләтле илебеҙҙә йәшәгән төрлө халыҡтарҙың традициялары атмосфераһына тулыһынса сумыуҙы тәьмин итәсәк, тип билдәләне ойоштороусылар.

Проектта 100-ҙән ашыу артист ҡатнаша. Музыканттар классик һәм халыҡ уйын ҡоралдарында уйнай.

"Шоуҙа оркестрҙар, бейеү төркөмдәре, дәүләт ансамбле һәм хор ҡатнашасаҡ. Кисә ҡунаҡтары төрлө музыка ҡоралдарын тыңлай аласаҡ: классик һәм халыҡ музыка ҡоралдарын. Сәхнәлә ҡурай, варган, домбра, гусли, барабан, укулеле һ.б. ишетергә мөмкин», - тип билдәләне «Берҙәмлек ауазы» проектының креатив директоры Артур Хәкимов.

Шулай уҡ тамашасылар традицион йырҙарҙан ләззәт ала һәм битбокс ишетә ала.

Шоуҙың төп визуаль һәм мәғәнәүи образы булып «берҙәмлек кәсәһе» тора, ул сценография, контент һәм айдентикала сағылдырыла. Ижадсыларҙың ниәте буйынса, төрлө артистар бер сәхнәлә берләшә, һәм һәр береһе үҙенең мәҙәни кодын, традицияларын һәм ҡиммәттәрен бер кәсәгә һала. Был идеяны тормошҡа ашырыу өсөн тап «Өфө-Арена» кәрәк була, сөнки был майҙансыҡ ҡына кәрәкле техник ҡарарҙарҙы: кәрәкле бейеклектәрҙе, аҫылмаларҙы, балкаларҙы файҙаланырға, шулай уҡ биш меңдән ашыу тамашасыны һыйҙырырға мөмкинлек бирә. Шоуҙа кинетик экрандар, күтәргес декорациялар, махсус эффекттары булған ике күренеш буласаҡ. Артур Хәкимов билдәләүенсә, тамашасылар төрлө йәштә: өлкән быуын – мәғәнәһен, йәштәр – билдәле башҡарыусыларҙы һәм бергә йырлау мөмкинлеген баһалаясаҡ, ә иң йәш тамашасыларға ҙур экрандар һәм вау-эффекттар оҡшаясаҡ.

Проекттың идеяһы Президент Владимир Путин иғлан иткән Рәсәй халыҡтары берҙәмлеге йылы контексында барлыҡҡа килде. Рәсәйҙә бер флаг аҫтында тиҫтәләгән халыҡ йәшәй. Улар төрлө булһа ла, берләштергән нәмәләр бар, музыка – шуларҙың береһе.

Продюсер һүҙҙәренсә, Өфө шоуҙы уҙғарыу урыны итеп осраҡлы һайланмаған. Ҡала ике ҙур мәҙәни һәм географик зонаны – Волга буйы менән Уралды берләштерә. Бында мәҙәни традициялар ныҡ үҫешкән һәм шул уҡ ваҡытта заманса музыка форматтарына ҡыҙыҡһыныу ҙур.

Сәхнә артында 170-тән ашыу кеше эшләйәсәк – төрлө йүнәлештәге белгестәрҙең ҙур командаһы: режиссерҙар, тауыш режиссерҙары, инженерҙар, яҡтыртыусылар, сәхнә хеҙмәткәрҙәре һәм башҡалар. 

Постановканың режиссеры - Чулпан Пиотровская, ул күп кенә мәҙәни проекттар өсөн, атап әйткәндә, Төньяҡ Кавказда «Кавказ Мюзик Фест» Беренсе музыка фестивале, һ.б. өсөн шоу әҙерләй.

"Беҙ был проектты ҙур шоу итеп кенә түгел, ә етди мәғрифәтселек бурысы итеп ҡабул итәбеҙ. Беҙҙең маҡсат – мөмкин тиклем күберәк кешегә Рәсәй халыҡтары музыкаһының ни тиклем заманса, йөкмәткеле һәм ҡеүәтле яңғырауын ишетергә мөмкинлек биреү. Уларҙы илдең мәҙәни байлығы менән таныштырырға һәм был бәйләнеште тере сәхнә хәрәкәте аша тойорға ярҙам итергә», - тип һөйләне Чулпан Пиотровская.

Проекттың амбассадоры, һигеҙ тапҡыр паралимпия спортсыһы Оксана Савченко, проектта ҡатнашыуы менән йәштәргә төп фекерҙе еткерергә теләүен һөйләне: мөмкин булмаған бер нәмә лә юҡ, иң мөһиме – бирешмәҫкә һәм үҙ маҡсаттарыңа табан барырға.

Шоу 15 майҙа 19.00 сәғәттә башлана һәм 1,5 сәғәт дауам итә.

Сараға инеү ирекле. Билетты «Берҙәмлек ауазы» сайтының асыҡ битендә теркәлгәндән һуң алырға мөмкин.