Һалдаттар уны “йырҙар маршалы” тип атай.

Һалдаттар уны “йырҙар маршалы” тип атай.   Бөйөк Ватан һуғышы йылдарында Башҡортостандың сәнғәт оҫталары ла үҙ таланттарын ҡорал итеп файҙалана. Фронт һыҙығында, саҡырыу пункттарында, вокзалдарҙа, госпиталдәрҙә улар халыҡ йырҙары, ҡурай моңо, махсус рәүештә ижад ителгән марштар менән яугирҙарҙың рухын күтәрә. Бик күп артистар дошманды еңеүгә шулай үҙ өлөшөн индерә, ҡайһылары яу яландарында ятып ҡала. РСФСР-ҙың һәм БАССР-ҙың атҡаҙанған артисы Хәбир Ғәлимов концерт бригадаһы менән Сталинградҡа барып, унда ике ай концерттар ҡуйып йөрөгән саҡтарының бер мәлен бына шулай иҫкә төшөрә: “Волгаға барып еттек, ә алғы һыҙыҡҡа үтеү өсөн пропуск кәрәк. Бригадала мине ебәрергә хәл иттеләр. Әммә хәрби етәкселек минең урынға бер хәрбиҙе ебәрҙе. Ул, артһөжүмгә эләгеп, һәләк булды. Миңә ғүмер бүләк итеп, үҙе ятып ҡалды... Ғүмер буйы ошо баһаһыҙ бүләктең хаҡын ҡайтарырға, өмөтөн аҡларға тырыштым. Беҙ Сталинградҡа ҡала азат ителгән көндө керҙек. Аяҡ аҫты тулы үле кәүҙәләр... Бихисап концерт ҡуйҙыҡ. Һуңынан эвакогоспиталдәрҙә сығыш яһаныҡ. Өфөләге хәрби частарҙа көнөнә 3-4-әр концерт күрһәтә инек....” 1942 йылда Башҡортостанда 112-се Башҡорт кавалерия дивизияһы ойошторола башлағанда ла Х. Ғәлимов яугирҙарҙың рухташ дуҫына әүерелә.