Хеҙмәте менән хөрмәтле

1894 йылда Өфө губернаһы, Минзәлә өйәҙе Яңы Зыяш ауылында тыуған (әлеге ваҡытта Татарстан Респубикаһының Аҡтаныш районы Яңы Зыяш ауылы).
Әлиевтар нәҫеле Сәфәр ауылы башҡорттарынан: Әбйәлил – Әбделсәлих – Әбделғәле – Яҡшығол – Әбделханнан. Ҡайһы бер сығанаҡтарҙан билдәле булыуынса, Тәҡиулланың атаһы Әбделханнан мулла булған, мосолман ойошмаларының яңы ағымын һайлаған.

Тәҡиулла Әлиев 1918—1919 йылдарҙа Башҡорт ғәскәрҙәрендә хеҙмәт итә. 1918 йылдың сентябрендә – Башҡорт Хөкүмәте эргәһендәге комендант ротаһы командующийы, ә октябрҙән Башҡорт хәрби советында офицер булған.

1919 йылдың февралендә Башҡорт ғәскәрҙәре штабының коменданты, өлкән адъютанты вазифаһын башҡарған, ошо уҡ йылда штабс-капитан званиеһын алған. 1919—1922 йылдарҙа Ҡыҙыл армия сафында хеҙмәт иткән.

Тәҡиулла Әлиев артабан сәйәсәттән ситләшә, үҙ юлын сәнәғәт өлкәһендә таба. Тәҡиулла Әбделханнан улы Өфө үҙәк электростанцияһының проект авторы, Урал-Волга буйы, Ҡаҙағстан һәм Белоруссиияла электр станциялары һәм электр үткелдәре линиялары төҙөлөштәре етәксеһе була, Свердловск ҡалаһында троллейбус линиялары төҙөүгә етәкселек итә.

Бәғзеләрҙә шундай шанлы, үҙенсәлекле биографиялы кеше нисек репрессия йылдарын имен-һау үткәргән, тигән һорау тыуыр. Беренсенән, дәһшәтле осор еткәнгә тиклем ул сәйәсәттән күпкә йыраҡлашҡан булһа, икенсе яҡтан, Тәҡиулла Әлиев кеүек һөнәр оҫталары, гигант төҙөлөштәргә етәкселек иткән белгестәр күп булмағандыр.

Арҙаҡлы милләттәшебеҙ фиҙакәр хеҙмәте өсөн 1952 йылда Хеҙмәт Ҡыҙыл Байраҡ ордены менән наградланған. 1957 йылда вафат булған.
Бөгөн ил тарихында онотолмаҫ эҙ ҡалдырған Тәҡиулла Әлиевтың исеме Өфө һәм Екатеринбург ҡалаһындағы урамдарға бирелгән.