-25 °С
Болотло
75 лет Победы
Бөтә яңылыҡтар
Тарих һәм шәхес
11 Август 2020, 17:00

Ҡайғылы хәбәр

Башҡортостандың халыҡ артисы Роза Шәйхетдин ҡыҙы Кәримова беҙҙең аранан китте. Яҡындарының ауыр ҡайғыһын уртаҡлашабыҙ, сабырлыҡ теләйбеҙ.

Кәримова Роза Шәйхетдин ҡыҙы 1935 йылдың 7 ноябрендә Нуриман районының Иҫке Күл ауылында донъяға килә. РСФСР-ҙың атҡаҙанған актрисаһы (1985), БАССР-ҙың халыҡ (1977) һәм атҡаҙанған (1972) актрисаһы. Театр эшмәкәрҙәре союзы ағзаһы (1961).
Роза Кәримова 1959 йылда Мәскәүҙә А.В.Луначарский исемендәге Театр сәнғәте дәүләт институтын тамамлағандан һуң (Б.В.Бибиков һәм О.И.Пыжова курсы) Башҡорт академия драма театрына эшкә ҡайта. Мәжит Ғафури исемендәге Башҡорт дәүләт академия драма театры ҡуйған спектаклдәрҙәге төрлө ролдәрҙә уйнай. Ул лирик-һәм драматик ролдәрҙе лә, комик‑сатирик ролдәрҙе лә уңышлы башҡара. Сит ил, рус һәм башҡорт авторҙары пьесалары буйынса был театр сәхнәһендә ҡуйылған спектаклдәрҙә 80-дән ашыу образ ижад итә.
1989 йылдан 1995 йылға тиклем Республика йәш тамашасы театры (хәҙерге Мостай Кәрим исемендәге БР Милли йәштәр театры) актеры була.
1961 йылдан алып Театр эшмәкәрҙәре союзы ағзаһы.
1966 йылда СССР-ҙағы поляк драматургияһы фестивалендә «Улар дүртәү ине» (Х.Вуолийоки, режиссеры Изабелла-Мария Цивиньска, Польша) трагикомедияһында Ҡатын роле өсөн Роза Каримова тәнҡитселәрҙең һәм фестиваль комиссияһы ағзаларының юғары баһаһына лайыҡ була. 1977 йылда Польшала үткәрелгән Совет драматургияһы фестиваленә почетлы ҡунаҡ сифатында саҡырыла.
Роза Кәримованың ире - актер, режиссер, 1969-1976 йылдарҙа Башҡорт АССР-ы мәҙәниәт министры Вил Сәғит улы Кәримов. Роза Шәйхетдин ҡыҙы үҙен ирҙән уңдым тип һанай, театр һәм сәнғәтте бик яҡшы белгән Вил Сәғит улы уның ижади эшмәкәрлеген баһалаусы, тәнҡитсе була. Кәримовтарҙың улы Булат Кәримов - режиссер, БСТ тапшырыуҙарын алып барыусы. Тамашасылар уның эшмәкәрлеге менән "Следопыт" тапшырыуы аша таныш.
Ҡыҙҙары Гөлназ Өфө сәнғәт институтын (1987) һәм Мәскәүҙә ГИТИС аспирантураһын (1989) тамамлағандан һуң Германияға китә. Хәҙер Берлинда дубляж студияһында башҡарыусы директор.
Башҡорт драма театрында тыуҙырған образдары: Люся («Эҙләнеү йылдары» — «Годы странствий», А. Н. Арбузов; дебют, 1959), Ғилминур («Әсәләр көтәләр улдарын», Ә.М.Мирзаһитов), Хәҙисә («Ҡыҙыл паша», Н.Асанбаев), Бимаза («Диктаторға ат бирегеҙ!», М.Кәрим), Мирандолина («Хозяйка гостиницы» К.Гольдони), Джен («Мария Тюдор», В.Гюго), Ғилминур («Әсәләр көтәләр улдарын», Ә. Мирзаһитов) һ.б.
Милли Йәштәр театрындағы ролдәре — Палапан («Иҙеүкәй менән Мораҙым», М.А.Буранғолов), Кукушкина («Төшөмлө урын» — «Доходное место», А.Н.Островский), Макпал («Мөхәббәт тураһында легенда» — «Легенда о любви», Г.М.Мусрепов).
Актерҙың таланты классик репертуар спектаклдәрендә тулы асыла: Джульетта («Ромео һәм Джульетта» — «Ромео и Джульетта», У.Шекспир), Нина Заречная («Аҡсарлаҡ» — «Чайка», А.П.Чехов), Надежда Коломийцева («Һуңғылар» — «Последние», М.Горький), Акулина, Анна Дмитриевна ("Ҡараңғылыҡ хөкөм һөргәндә" - «Власть тьмы», «Живой труп», Л.Н.Толстой) һ.б.
Читайте нас в