Балыҡ яратыусы

Бер кеше танышының йортона барған. Теге балыҡ ашап ултыра икән.
--Һәр ваҡыт балыҡ ашайһың, ниңә итең юҡмы ни? — тигән килеүсе танышына.
--Белгең килһә, балыҡ башты эшләтә. Уның составында кальций, фәлән-төгән бар. Ышанмаһаң, һин дә ашап ҡара. Миндә балыҡ күп, килоһы 5 һум, һатам, — тип тегеһе балыҡтың файҙаһы хаҡында лекция һөйләп алып киткән.
Ышандырған ит яратҡанды балыҡ яратҡан. Һөҙөмтәлә ит яратҡан 5 һумға бер кило балыҡ һатып алған. Өйөнә ҡайтып балыҡты ашап ҡараһа, иҫке ауыҙға яңы аш тигәндәй, оҡшап киткән был ризыҡ. Магазинға балыҡ эҙләп киткән. Барһа, шундай уҡ балыҡтың килоһы 50 тин генә тора, имеш. Асыуын ҡайҙа ҡуйырға белмәйенсә, ярһып килеп еткән үҙен алдатҡандың йортона ит яратҡан.
--Минең елкәлә байып ҡалырға булдыңмы, 50 тинлек балығыңды 5 һумға һатып, — тип тегенең өҫтөнән тауҙай булған.
--Ошоно аңлар өсөн дә һиңә 5 һумлыҡ балыҡ ашарға кәрәк булған тимәк, мин һиңә балыҡ башты эшләтә тип башта уҡ әйттем бит, — тип яуаплаған балыҡ яратҡан, ит яратҡандың ауыҙын шапылдатып ябып.

"Мең дә бер күҙәтеүем"
яҙмаларынан 620-се күҙәтеү.

Әхмәт ҮТӘБАЙ.