ЛАҠАПТАР

Ир менән ҡатын урманда ятып бесән эшләгән икән. Бер көн таңға яҡында ғына айыу үкергән. Былар ҡурҡышып күршеләренә ҡарай йүгергән. Ир кеше йүгергәндә ҡатынын үтеп китеп артта ҡалдырған, ти. Шулай йүгерешеп күрше бесәнселәр ҡыуышына барып еткәндәр. Аҙаҡ ир, оялып, “ҡараһам бисәкәй хәтәр шәп йүгерә, туҡта, мин аны үтәләм микән тип ҡыҙҙырғайным – үтәм икән” тигән булған. Берәй нәмәнән ҡасҡанда йәки өлгөрәйем тип йүгерешкәндә “үтәләм микән тиһәм, үтәләм икән” тип көлөшәләр.

Бер инәй телефондағы “Абонент не доступен” тигәнде үҙенсә аңлап, “ҡыҙыма шылтыратһам “нидастуйын” тип торасы, нишләп минең ҡыҙым нидастуйын булһын, хатта дастуйын” тип көйә икән. Хәҙер кемдер “не доступен” булғанда, был да нидастуйын тип көләбеҙ.

Беҙҙә ҡасандыр Әйүп тигән балта оҫтаһы йәшәгән. Тегене кешеләр яллаһа, килеп башланасаҡ эште ҡарап сыға ла: “Тә-ә-әк” тип һуҙа икән. Яллаусылар бының ризалығын шунда уҡ аңлап бер яртыны сығарып бирә. Шунан ҡалған лаҡап: “тәк” тигәндә Әйүп ҡарта бер ярты.

Лилиә Исмәғилева.

https://henek.info/articles/shulay-a-bula/2023-04-22/la-aptar-teld-n-sy-a-3225557