Отчет-һайлау йыйылышы

– Тәк, йыйылышып бөттөгөҙмө? Ғәҙәттәгесә, Фәһимә балдыҙ һуңлай. Ҡурҡынысы юҡ, самай кәрәк ваҡытта килеп инә торған. Ҡалғандар менән башлай торайыҡ.

Бөгөнгө йыйылышты асып, шуны әйткем килә, туғандар. Ошо көндәрҙә өҫтән тикшереү килеп төшөүе бар, шуға һеҙҙе тағы борсорға тура килде. Үҙегеҙ беләһегеҙ, һеҙҙән башҡа минең ышаныр, таяныр кешеләрем дә юҡ, ней, балалар үҫмәгән әле, уларҙың да ваҡыты етер, кәнишнә. Әлегә, үҙегеҙ күреп тораһығыҙ, донъялар буталсыҡҡа әйләнеп бара. Кем нисек булдыра ала, шулай йәшәп, әрһеҙерәктәр ябай халыҡты алдап маташа. Булдыра алмағандар инде, үҙҙәре ғәйепле. Ну, дөйөм алғанда, кемгә еңел хәҙер? Бергә булырға кәрәктер, тип уйлайым… Тел төбөн аңлайһығыҙҙыр… Ҡхм, Ҡхм…

Ярай, улайһа. Тәк, Сәлиә ҡоҙағый, был арала ҡалаға, баҙарға тип сапмайыраҡ торорһоғоҙ инде, минең списокта һеҙ – мәктәп директоры. Ҡурҡма, һатыуға тигән ҡорот-эремсектәреңә бер ней булмаҫ, бөтәһе лә үткәс, үҙем машина менән алып барып, хатта һатышып ҡайтырмын.

Мә,бына ошо ҡағыҙҙа яҙылғандарҙы ятла, теге ваҡыттағы һымаҡ үҙеңдән бер нәмә лә өҫтәмә инде, зинһар. Кабинеттың асҡысы вахтала, уҡытыусылар иҫкәртелгән. Кеҫәңә төшөр һандар ҡағыҙҙың артында яҙылған.

Дәлше киттек. Рәжәп ҡәйнеш, һин өйрәнгән кеше булараҡ, тағы ла шул ферма мөдире булып торорға тура килер. Ҡурҡма, бынау ҡағыҙҙа бөтәһе лә яҙылған. Тик күрһәткестәрҙе генә бутап ҡуйма инде. Гонорары тураһында бөгөн кис үҙем инеп сығырмын, шунда килешербеҙ.

Тә-әк, артабан, Мәүлиә еңгә, балалар баҡсаһы мөдире вазифаһы һиндә. Үҙең беләһең, был өлкәлә һинән дә шәбе юҡ. Ул тауыш тиһеңме, үҙеңде тотошоң — бына һуйған да ҡаплаған мөдир, эйе, ысынлап әйтәм. Йәл, уҡымағанһың ғына. Ул сағында… тәүбә-тәүбә, әллә нимәгә төшөп барамсы… Ә-ә, Фирүз ағайымдың рөхсәтен алдым, ул үҙе бер көнгә шунда ҡарауылсы булырға ризалашты. Һеҙҙең менән дә ҡул бирештек.

Ә-һә, бына Фәһимә балдыҙ ҙа үҙ ваҡытын белеп кенә килеп етте. Ызначит һин, был юлы клуб мөдире. Фигураң да, һөйләшеүең дә, йылмайыуың да килешеп кенә тора. Тик юбкаңдың оҙонорағын кейеп, ирен буяғысыңдың төҫһөҙөрәген һөртөн, йәме. Еҙнәкәйеңде беләһең, буш итмәм. Тағы ла, ҡара әле, балдыҙым-яңғыҙым, тикшереүселәргә бәйләнмә пажалыста. Яңғыҙ булһаң ни, йәшең үтмәгән әле. Кем әйтмешләй, самай һөйөр саҡ ҡынаң. Үҙем һиңә тигәнен генә табып бирермен. Ҡурҡма, күптән ҡарап та ҡуйғанмын. Тик һин кеше алдында минең йөҙҙө ҡарайтма инде!

Тәк-тәк, эһе, бригадир… Теге ней бит әле, Нәзир бажа, һиңә генә күҙ төбәп торам. Минең ҡыҙған саҡта әйтелгәндәрҙе ғәфү ит инде, йәме… Ни тиһәң дә бажаларбыҙ, ғүмер буйы күрше йәшәйбеҙ. Яңы йортоңдо бөтөрөшөрмөн, балаларың, әйҙә, рәхәтләнеп беҙҙең быуала һыу инһен. Жәлке түгел. Тик һин күпте беләһең, белгәндәреңде онот та, бына ошо ҡағыҙға һиңә лә текс төҙөгәйнем. Артыҡ һүҙ – юҡ һүҙ була ул. Гонорарын еткәнсе түләрмен, килештекме? – тип тамамланы йыйылышты ауыл хакимиәте башлығы, мәктәп директоры, ферма мөдире, балалар баҡсаһы мөдире, клуб мөдире, бригадир вазифаларын бергә алып барыусы Ҡаҙнабаев. – Барыһы ла булды шикелле…

Рәзилә ЫРЫҪҠУЖИНА

ИҪБАТЛАНЫМ

1981-се йылда Ҡырмыҫҡалы районынан: «Юнир Салауатов тигән артисығыҙҙың сығышының мәғәнәһе юҡ, башҡаса уны сәхнәгә сығармағыҙ», – тип бик күп тәнҡиттәр менән минең өҫтән ялыу яҙғандар. Был хатты алғас, мине яратып етмәгән етәкселәр бик шатланып, шым-шым ғына үҙ-ара хатты тикшереп, «профнепригоден», тигән һығымта менән мине эштән ҡыуырға әҙерләнгән булғандар. Иң һуңғы тапҡыр, тип миңә һүҙ бирҙеләр. Шунан мин:

– Был хатты мин үҙем яҙҙым. Бына копировка аша яҙылған икенсе экземпляры миндә, – тип, ҡара ҡағыҙын да күрһәттем. Бер кем дә бер һүҙ әйтә алмай шып-шым булдылар, шулай ҙа берәүһе ҡыйыр-ҡыймаҫ ҡына:

– Быны ни өсөн эшләнең инде? – тип һораны.

– Иң тәүҙә ялыуҙы кем, ҡайҙан яҙғанлығын тикшерәләр. Ә һеҙ – юҡ. Бына адресында туғыҙ урынлы индекс, урам адресына минең әсәйемдең исеме, ҡыҙ фамилияһы яҙылған. Береһен дә тикшермәйенсә, бик шатланып миңә тотондоғоҙ. Һеҙ нахалдар булып сыҡтығыҙ. Концерттағы сығыштарымды күрмәмеш булаһығыҙ ҙа, миндә юмор юҡ, тиһегеҙ. Юморымдың барлығын тағы бына шулай иҫбатларға мәжбүр булдым.

Шунан икенсе берәүһе:

– Да, һинән була, – тине.

Был хәлдән һуң уларҙың мөнәсәбәте яҡшырҙы. Тағы берәй номер уйлап табып, беҙҙе оятҡа ҡалдырмаһын, тип уйлағандарҙыр.

Юнир САЛАУАТОВ

Читайте нас:

© 2024 "ТАМАША" Республика мәҙәниәт һәм сәнғәт журналының сайты.
Сайт Республиканского журнала культуры и искусства "ТАМАША".
Ойоштороусылары: Башҡортостан Республикаһының Матбуғат һәм киң мәғлүмәт саралары буйынса агентлығы; Башҡортостан Республикаһының "Республика Башкортостан" нәшриәт йорто дәүләт унитар предприятиеһы.
Учредители: Агентство по печати и средствам массовой информации Республики Башкортостан; Государственное унитарное предприятие Республики Башкортостан Издательский дом "Республика Башкортостан".

Зарегистрирован Федеральной службой по надзору в сфере связи, информационных технологий и массовых коммуникаций 5 ноября 2015 года. Свидетельство о регистрации ПИ № ТУ02-01477

Телефон

(347)292-77-64

Электрон почта

[email protected]

Адресы

450079, Республика Башкортостан, г. Уфа, ул. 50-летия Октября, 13, каб. 612