«Ҡаҙ бәлеше, ҡоймаҡ еҫе Өй эстәренә тулһын!»

Һалҡын көндәрҙең береһендә «Айыҡ ауыл» конкурсы нигеҙендә ҡаҙ өмәһен дә халҡыбыҙ йолаһына ярашлы, башҡаларға өлгө булырҙай итеп, урыны-еренә еткереп башҡарған исламбайҙар. Был йоланы күрһәтеү иң уңған, тырыш, татыу ғаиләләрҙең береһе - Миләүшә менән Раил Хәйбуллиндарҙың өлөшөнә төшкән. «Йорт хужаһы мейес сығарыу оҫтаһы булһа, хужабикә ҡул эштәренә маһир, күлдәктәр ҙә бәйләй. Өҫтәүенә бер концерт та унһыҙ үтмәй: бик моңло тауышлы йырсы ла ул беҙҙең», ти ауыл китапханаһы мөдире Флүзә Әхмәтйәнова улар тураһында. Уңған ғаилә күпләп мал-тыуар тота, йыл да ҡош-ҡорт алып ҡарай, баҡса тултырып йәшелсә-емеш үҫтерә.

Был көндә милли кейемдәге ҡатын-ҡыҙҙар өмә үтәсәк йортҡа иртүк йыйылды. Хужа ҡаҙҙарҙы салып биргәс,

«Ап-аҡ булып йөҙөгөҙ,
Йылға буйлап күмәкләшеп,
Һирпелешеп»,

«Өйөң ҡаҙлы булһын!
Мамыҡ яҫтығы булһын!
Ҡаҙ бәлеше, ҡоймаҡ еҫе
Өй эстәренә тулһын!» тигән теләктәр әйтешеп, эшкә тотондо улар. Теҙелеп ултырып, гармунға ҡушылып халыҡ йырҙарын йырлай-йырлай, ҡаҙ мамығын йолҡоу күңелле байрамға әүерелде. Эстәрен алып таҙартҡас, түшкәләрҙе көйәнтәләргә элеп, йылғаға төшөп сайҡатҡанда ла үҙ-ара шаяра-көлә аралашыу, изге теләктәр әйтешеү, йыр-моң тынманы.

Ә кис ярҙамсыларҙы хужабикә бешергән ҡаҙ һурпаһы, ит, ҡоймаҡлы сәй табыны көтә ине. Киләһе йылда ла ҡош-ҡорттарының уңыуын, үҙҙәренә һаулыҡ, донъяға именлек теләп, рәхмәттәр әйтеп таралышты өмәселәр был ҡунаҡсыл йорттан.

Афарин, Исламбай халҡы! Дәртегеҙ бер ваҡытта ла һүнмәһен, гел шулай берҙәм, татыу булығыҙ. Киләсәк быуынға халҡыбыҙҙың рухи хазинаһын тәшкил иткән йола-ғәҙәттәрҙе һөйләп түгел, ә үҙ миҫалығыҙҙа эшләп күрһәтеүегеҙ маҡтауға лайыҡ!

Ә. Ғиззәтуллина.
Фотолар Исламбай ауыл мәҙәниәт йорто төркөмөнән.

https://vk.com/kurultaibashkir