Күңел сәхифәләре, йәки сер ғилеме эйәһе Мөжәүир хәҙрәт менән осрашыу.

Хәҙерге көндә Күмертау ҡалаһында йәшәп ятҡан, ғүмере буйы уҡытыусы булып эшләп, хаҡлы ялға сыҡҡан Вәлитова Райхана Муллағәли ҡыҙының мине бик тә күргеһе килә, тип ишеттем.- Һикһән ике йәштәмен. Халҡыбыҙҙың бөйөк әүлиәһе Мөжәүирхәҙрәт тураһында белгәндәремде, мине нисек ауыр сирҙән арындырғанын, уның яҙып биргән бетеүенең килешеүен кешеләргә һөйләп ҡалдырмаһам, миңә яҙыҡ булыр төҫлө. Тормошома нур булып ингән, Аллаһы Тәғәләмдең барлығына, берлегенә инаныс уятҡан әүлиәбеҙҙең изгелектәрен онотһам рухы алдында гонаһлы булырмын һымаҡ. Йәнә, изгебеҙҙе онотмауҙың сауабы ҙурҙыр, тим. Мәңгелек йортта ла рухташтар, диндәштәр булып осрашһаҡ ине. Мине үҙ янына алып, сират күперҙәрен үткәндә Аллаһ ҡаршыһында шәфәғәтсем булырына өмөтләнгем килә. Зинһар, яҙып алсы хәтирәләремде, туғаным, китабыңда баҫтырып сығар.Бындай үтенестәргә ихтибарлымын. Әүлиәбеҙҙе яратҡан, ихтирам иткән, изге эштәрен онотмаған, уны яҡшы һүҙ менән телгә алған һәр кем миңә яҡын һәм ҡәҙерле, улар минең яҡын дуҫыма әүрелә.Райхана апайҙың ҡартлыҡ эҙ һалған, әммә йәшлек сибәрлеген юймаған һөйкөмлө йөҙөнә яратып ҡарайым. Танышып, хәл-әхүәл һорашып алғас:- Олатай тураһында ниҙәр беләһегеҙ, һөйләгеҙ әле, - тим.- Маңлайяҙып, иркенләп барыһын да һөйләшәйек.Мөжәүир хәҙрәт образы ҡөҙрәт һәм изгелек һынланышы булып мәңгелеккә йөрәгенә уйылып ҡалған апайыбыҙ шуны ғына көтә ине, ахрыһы, тулышып түгелергә торған күңел сәхифәләрен ихласлап сисә башланы.- Олатайҙың кешегә бер ҡарашы, бер әйткән һүҙе, өшкөргәндәгетылсымлы тыны кешеләргә һаулыҡ-сәләмәтлек ҡайтара алыуын үҙ күҙҙәрем менән күреп инандым, - тип башланы һүҙен Райхана апай. Ул бик тулҡынлана ине, күҙҙәренә йәш алып, бер килке өндәшмәй торҙо. Сумкаһынан бер дәфтәр килтереп сығарҙы ла миңә һондо:- Ошонда барыһы ла яҙылған. Уҡып сыҡһағыҙ, аңларһығыҙ.Дәфтәрҙе ҡулыма алып күҙ йүгертәм. Сымыры хәрефтәр менән яҙылған ҡульяҙманы ҡараштырып сыҡҡан арала апайыбыҙ бер аҙ тынысланды, ниһайәт, телгә килде:- Баймаҡта уҡытыусы булып эшләп йөрөйөм, комсомолкамын.Иптәшем дә, үҙем дә совет заманы кешеһебеҙ, Аллаһты ла мулланы ла бар тип тә белмәйбеҙ. Бер ваҡыт ҡулымдың һыртын ниҙер сыйып ҡына китте лә күҙ алдымда тәнем боҙола башланы. Таң атҡансы ҡулымдың аҙ ғына яраланған урыны зәңгәрһыу-ҡыҙыл төҫтәге күпертке булып шешеп сыҡты. Түҙеп торғоһоҙ ҡысыттыра, ауырта. Иртәнсәк илай-илай врачҡа киттем. Улар был сиргә ниндәй диагноз ҡуйырға белмәй Сибай дауаханаһына оҙаттылар. Бында мине шунда уҡ больницаға һалдылар ҙа дауалай башланылар. Уколын да ҡаҙайҙар, төрлө маздар һөртөп ҡарайҙар. Бер нәмә килешмәй. Ауырыу шаша ғына, ике ҡулым ҡутырлап китте, сыҙап торорлоҡ хәлем ҡалманы.Шул ваҡыт палатала ятҡан оло ғына бер ҡатын, йәлләне буғай, мине бер ситкәрәк алып китеп:- Һылыу, һинең был сиреңә тик Мөжәүир олатай име генә килешер.Больницанан сыҡ та тиҙерәк Манһырға бар. Юғиһә, ҡысыуың шашыр, тәнеңде ҡаплап алыр, һуң булып ҡуйыр, -тине.Ысынлап та, ҡысыу шашҡандан- шаша, ә табибтар ярҙам итә алмай. Ни эшләргә? Уҡытыусы, комсомолка башым менән муллаға барыуҙы күҙ алдына килтермәйем. Шелтә биреп, комсомолдан сығарып ҡуйһалар ни эшләрмен? Бергә эшләгән әхирәтемә был турала әйткәйнем:- Унда барғаныңды берәүгә лә әйтмәҫһең, үҙең генә бел дә ҡуй, - тине. - Тиҙерәк күрен Мөжәүир хәҙрәткә, уға барған кеше һауыҡмай ҡалмай.Икеләнеп кенә, аптырағандың көнөнән, юлға сыҡтым. Берҙән, кеше белеп ҡалһа, тип ҡурҡам; икенсенән, Мөжәүир хәҙрәттең һауыҡтыра алыу ҡөҙрәтенә ышанып етмәйем. Ниндәйен маҡтаулы доктор төҙәтә алмағанды утарҙа йәшәгән бер ҡарт бабай уны нисек төҙәтер икән, тип уйлай.Мөжәүир хәҙрәт мине йылмайып ҡаршы алды:- Йә, килдеңме комсомолка? - тине. - Ышанмаһаң да, ҡурҡа-ҡурҡабулһа ла килдең инде, ә? Ауырыу шулай ул, ҡыҙым, Аллаһты ла, мулланы ла таныта. Хәҙер минән һауығып ҡайтһаң, уҡытыусы булып нисек эшләрһең икән? – Үҙе рәхәтләнеп көлөп алды.Уҡытыусы булып эшләүемде, бында теләр-теләмәҫ килеүемде хәҙрәттең белеп тороуы мине шаңғытты. Оялышымдан башымды аҫҡа эйҙем. Олатай дауам итте:- Нимә, ҡулыңдың боҙолоуын табибтар экзема тинеме? Экземабулһа, дауалары килешер ине, түгел шул. Сихырланған әйберҙе тотҡанһың, ҡыҙым. Сихырға балнистыҡы килешмәй.“Больницала ятыуымды ла белеп тора бит әле”,- тип кенә уйлағайным:- Беләм, балам, беләм, барыһын белеп, күреп торған өсөн кешеләрмиңә ышанып киләләр бит, - тип көлдө олатай.Райхана апай иҫе-аҡылы китеп күргән-белгәндәрен теҙеп һөйләй, ә мин олатайҙың ошо бағымсылыҡ һәләте, алдан күрә белеүе тураһында йөҙәрләгән кешенән ишетеп, барыһын бергә туплап китап яҙған кеше, Аллаһы Тәғәләмә рәхмәт әйтеп, ҡыуанып ултырам. Ошондай илаһи ҡөҙрәт һәм хикмәт эйәһе тураһында нәҡ миңә яҙырға насип иттең, Раббийем, тим.Уның ҡаты бәрелмәй уйынсалап, шаяртып һөйләшеүе, мөһаббәт ҡиәфәте, ихласлығы Райхана апайҙы әсир итә.- Ғәфү итегеҙ, олатай, сыҙар хәлдәрем ҡалманы, тәҡәт итә алмайым, зинһар өсөн мине ҡарап ебәрегеҙ, - тип үтенә ауырыу. –Ошонан һауыҡһам, дин юлына баҫырмын, Аллаһ бирһә.- Ҡарайым, ҡыҙым, ҡарайым, минең бит Аллаһтан тәғәйенләнешем - кеше ҡарау. Һине аңлайым, заманаһы шулай. Әммә килер бер көн, Аллаһтың барлығын, берлеген бар халыҡ таныр, тик көнө бөгөн түгел.