Ғүмеребеҙ ҡалала үтһә лә, тыуған яҡ һәр саҡ үҙенә тартып тора

«Ғүмеребеҙ ҡалала үтһә лә, тыуған яҡ һәр саҡ үҙенә тартып тора. Ваҡыт булғанда, зәңгәр күлдәр иле – Әбйәлилемә һағынып ҡайтам. Ҡатын-ҡыҙ өсөн килен булып төшкән ер ҙә күңелгә яҡын төйәккә әйләнә икән ул.

Халҡыбыҙҙың "Үҫкән ерҙән - төшкән ер" тигән мәҡәле тап ошо хаҡта. Бынан 32 йыл элек Күгәрсен районы Үрге Мөрсәләй - Дөмбәй ауылына килен булып төштөм. Тормош иптәшем Иректең тыуған яҡтары, йәмле Оло Эйек йылғаһы буйҙары – яратҡан ҡәҙерле төйәгем минең. Фотола йәйҙең хозур иртәһендә хуш еҫле гөл-сәскәләр яландарҙы гиҙеп, мәтрүшкәләр йыйып ҡайтып киләбеҙ Ирек менән. Өйҙә яратҡан ҡәйнәм тәмле бәлештәр бешереп көтә. Ҡәйнеш, килен, уларҙың балалары менән шау-гөр килеп ял итәбеҙ, аллаға шөкөр. Шуныһы ҡыуаныслы: беҙҙең - сәхнә кешеләренең тормошо ауыл халҡы менән айырылғыһыҙ бәйле. Гастроль сәфәрҙәре башланыу менән яратҡан тамашасыларыбыҙ янына ашҡынабыҙ. Ижад юлымда 100-ҙән ашыу сит илдәрҙә, Рәсәйҙең күп төбәктәрендә булдым – бихисап ер-һыуҙар күрҙем, әммә моңло ҡурай яңғыраған мәғрүр тауҙар, мул һыулы йылғалар, ҡуйы урмандар, хәтфә болондар, зәңгәр күлдәр иле – тыуған Башҡортостаным – иң гүзәл ер ул».

Фотола Римма тормош иптәше – Башҡортостандың халыҡ артисы, Мәжит Ғафури исемендәге Башҡорт дәүләт академия драма театры актеры Ирек Булатов менән.