Оҡшатҡандар уҡыһын, оҡшатмағандар урап үтһен

– Һәм бер мәлде, ҡапыл ғына шиғырҙарығыҙ социаль селтәрҙәр буйлап һибелеп киттеләр ҙә, бер иртәлә һеҙ тотош республикаға билдәле булып уяндығыҙ...

– Эйе, ижадымдың таралып, үҫешеп китеүе интернеттың әүҙемләшеүе менән бәйле булды. 2013 йылда Гөлнар ҡыҙым мине социаль селтәрҙәргә теркәне. Ҡәләмдәшем Гөлнур Ҡыуатова (әйткәндәй, Гөлнурҙы дүрт йәшлек сағынан уҡ беләм. Беҙ эшләгән Ейәнсура районы Юлдаш ауылы мәктәбе директоры Вил ағай менән Гөлшат апайҙың ҡыҙҙары ул, миңә үҙ һеңлем кеүек яҡын – Ф.А.) кәңәше буйынса шиғырҙарымды «дөрөҫ итеп» һала башланым. Шунан мине интернет даирәләрендә Гөлназ Ишемғолова күреп ҡалған. Уның да «Мөхәббәтле миҙгел» тип исемләнгән бик уңышлы эшләгән төркөмө бар ине. Артабан Гөлназ, шиғырҙарымды үҙенең төркөмөнә күсереп ҡуйып, мине билдәле итеүгә үҙ өлөшөн индерҙе. Тәүҙә элекке шиғырҙарымды урынлаштыра инем, һуңынан яңыларын ҡуя башланым. Кешеләр шиғырҙарымды уҡый, комментарийҙар, хаттар яҙа. Уҡыусы менән бәйләнеш булғас, хуплау, рәхмәт һүҙҙәре ишеткәс, яҙғы килеп кенә тора икән. Яңы шиғыр тыуҙымы, шунда уҡ интернетҡа сығарып ебәрәм... Улай йыш һалма, тиҙәр ине миңә. Әммә әҙер шиғырҙы ҡуймай түҙеп тороу ҡайҙа ти инде! 2014–2016 йылдарҙа бик әүҙем эшләнем. Ошо йылдарҙа китаптар сығара башланым. 2017 йылда Яҙыусылар союзына ағза итеп алдылар. Был минең өсөн ҙур ваҡиға булды, яуаплылыҡ тойғоһо уятты. Сейле-бешле шиғырҙар сығарырға хаҡым юҡ тип, уларҙы янымда ятҡыра биреп, һирәкләп кенә халыҡ иғтибарына, төркөмгә һала башланым. Күбеһен туранан-тура китап итеп баҫтырҙым.

– Йәшерен-батырыны юҡ, һеҙҙе башта тәнҡитләүселәр ҙә булды...

– Эйе, интернетта шиғырҙарым таралып киткәс, профессиональ шағирҙар бик ҡаты тәнҡит утында тотоп алды. Матбуғатта ла төрлө яҙмалар донъя күрҙе. Шиғриәткә хилаф ҡылыусылар, ҡағиҙәләрҙе боҙоп, юл һәләкәтенә килтереүсе «сәйнүктәр» улар, ундайға юл ҡуйырға ярамай, тип тә яҙҙылар. Шиғриәт һәммәһе өсөн дә түгел, бары һайлап алынғандар өлөшө имеш тә, минең ижадым уны бигерәк ергә, тормош-көнкүреш кимәленә төшөрә икән...

– Был йәһәттән һеҙҙең үҙегеҙҙең фекерегеҙ ниндәй?

– Мин былай тип яуап бирҙем: элек-электән әҙәби ижад менән бер рәттән халыҡ ижады ла йәшәгән. Һәм ул әҙәби ижадтан бер ҙә ҡайтыш булмаған. Минең ижадым, әйҙә, шиғыр тип тә аталмаһын ти, таҡмаҡмы, мәҫәлме, әллә бәйетме, ниндәй сүрәттә булһа ла, уның да йәшәргә хаҡы бар, оҡшатҡандар уҡыһын, оҡшатмағандар урап үтһен, тип яҙҙым.

– Шиғырҙарығыҙға йырҙар ижад итеүселәр күп. Был йүнәлештәге эшегеҙ нимәнән башланды?

– Зәһүрә апайымдың Сибайҙа йәшәгән сағы ине. Бер мәлде ул ҡала китапханаһында шағирҙарҙы, йырсыларҙы, композиторҙарҙы берләштергән «Рухи хазина» тип исемләнгән клуб ойошторғайны. Апайым үҙе шиғриәткә ғашиҡ кеше. Поэзия өлгөләрен тасуири итеп уҡый белә. Бер көндө осрашыуға минең бер шәлкем шиғырҙарымды ла компьютерҙан сығарып алып барған. Юлай ағай Моратов шунда бер-нисә шиғырымды һорап алған. Шулай итеп Юлай Моратов «Әгәр күптән ғашиҡ булмаһам» тигән шиғырыма йыр ижад итте. Әлеге ваҡытта ул йырҙы Әлим Ҡәйүмов башҡара. Шунан Гөлфиә Хәләфетдинова «Ғүмер – аҡҡан һыу» тип исемләнгән шиғырымды һорап алып, Азат Исҡужиндан йыр яҙҙырып йырланы. Бөгөн ул йыр Артур Туҡтағолов менән Миңзифа Исҡужина репертуарында ла бар. Уның тағы ла Хәлил Биктимеров, Нурия Абдуллина яҙған варианттары ла бар. Үҙешмәкәр композитор Рәсимә Динисламова ла тәүгеләрҙән булып шиғырҙарыма йырҙар яҙҙы. Йырҙарымдың һаны хәҙер 200 самаһы булып китте. Бик күп билдәле йырсылар, әйтеп үтеүемсә, Әлим Ҡәйүмов, Йәмил Әбделмәнов, Әлфиә Юлсурина кеүек вокал оҫталары ла башҡара уларҙы. Күптән түгел Вәхит Хызыров та йыр һорап мөрәжәт итте. Гүзәлиә Вәлиева, Әлфиә Заһиҙуллиналар менән дә хеҙмәттәшлектәбеҙ. Йырҙарымдың байтағы 25 февралдә Башҡорт дәүләт филармонияһында үтәсәк концертта танылған йырсылар башҡарыуында яңғыраясаҡ.

Әйткәндәй, минең һүҙҙәремә яҙылған йырҙарҙы Айҙар Ғәлимов, Эдуард Хөснөтдиновтар ҙа башҡара икән. Ә мин быны оҙаҡ ваҡыт белмәгәнмен дә....

Фирүзә Абдуллина менән мауыҡтырғыс, матур әңгәмәнән өҙөк. Мәҡәләне тулы килеш "Тамаша" журналының февраль һанында уҡырһығыҙ.

Беҙҙең МАХ каналына https://max.ru/tamasharb ҡушылығыҙ!