Бары тик ғәжәп талантлы һәм еңел булмаған яҙмышлы кеше тормошонан бер нисә эпизод. Еңел булмаған тим, сөнки иртә тол ҡалған Сафа Вафа улы өс бәләкәй улын яңғыҙ үҫтерә. Тормош әкренләп яйлана. Балалар үҫеп, аталарының хыялын тормошҡа ашыра, артист булып китә.
Мауығыуы булған кеше, ике ғүмер йәшәй
Сибайҙа уҙғарылған сараларҙа әүҙем ҡатнашыусыларҙың береһе ул – Сафа Ишмөхәмәтов. Бер ваҡыт, территориаль һайлау комиссияһы рәйесе булараҡ, коллегалары менән бергә Рәсәйҙә һәм Башҡортостанда һайлауҙар тарихына арналған күргәҙмә ойошторорға тәҡдим итә. Был башланғысты ҡаланың халыҡ мәҙәниәте һәм ял үҙәге ойоштороусылары ҙур теләк менән хуплай. Кешеләр бында, һайлау участкаһына, берәмләп тә, ғаиләләре, балалары менән дә килә һәм бындай мәғрифәтселек эшмәкәрлеге өсөн ойоштороусыларға рәхмәт әйтә.
«Күңел ынтылышы» исеме аҫтында Сибайҙың тарихи-тыуған яҡты өйрәнеү музейында нумизматика һәм бонистика күргәҙмәһе үтә. Ҡала коллекционерҙарының «Минең коллекциям – минең мауығыуым» исемле күргәҙмәһен асыу тантанаһында иһә һайлау комиссияһы рәйесе Сафа Ишмөхәмәтов күҙәтеүсе сифатында ғына түгел, ә уның туранан-тура ҡатнашыусыһы була. Сибай һәм Өфө коллекционерҙары шәхси нумизматик коллекцияларын тәҡдим итә, Сибай музейы фондынан да экспонаттар ҡуйыла. Сараға килеүселәр XVIII–XIX быуаттарҙағы Рәсәй империяһының һирәк осрай торған боронғо тәңкәләрен, ҡағыҙ банкноттарын, хәҙерге юбилей һәм иҫтәлекле даталарға арналған, мәҫәлән, Сочиҙағы Олимпиадаға, рус ҡалаларының юбилейына ҡарата сығарылған ҡыҙыҡлы коллекцияларҙы, шулай уҡ сит илдәрҙең ҡағыҙ купюраларын күрҙе.
Дүрт шәхси нумизматик коллекция араһында Сафа Ишмөхәмәтовтың экспонаттары ла була. Коллекция туплау менән ул утыҙ йылдан ашыу шөғөлләнә. Уның экспонаттар күргәҙмәһе күп төрлө: бик боронғо тәңкәләр, ҡағыҙ банкноттар һәм значоктарҙан йыйылған бай коллекцияһы бар. Улар буйынса ул ил, мәҙәниәт, халыҡ йолалары үә ғөрөф-ғәҙәттәре һәм иҫтәлекле тарихи даталар тураһында еңел дә, асыҡ та итеп һөйләй.
Ҡала коллекционерҙары күргәҙмәһенә килеүселәр һайлау комиссияһы рәйесенең көтөлмәгән мауығыуына хайран ҡала.
– Тәңкәләр һәм банкноттар йыйыу – бик ҡыҙыҡлы һәм мауыҡтырғыс шөғөл, ул аң даирәһен киңәйтеүгә булышлыҡ итеп кенә ҡалмай, ә кешенән коллекцияға бәйле теге йәки был өлкәлә белгес яһай, – тип иҫәпләй Сафа Вафа улы. – Был, ҡағиҙә булараҡ, тарихи һәм социаль күренештәргә бәйле сығарылған тәңкәләрҙе өйрәнеү процесы менән бергә бара. Шуға күрә тәңкәләрҙе йыш ҡына билдәле бер, мәҫәлән, ил, дәүер, сығарылған йылы һәм башҡа билдәләре буйынса классификациялайҙар.
Мауығыуы булған кеше, ике ғүмер йәшәй, тиҙәр халыҡта. Был, ысынлап та, шулай! Көндәлек мәшәҡәттәр араһында коллекционерҙар үҙҙәренең яратҡан эше менән шөғөлләнергә лә ваҡыт таба, был уларға ваҡытты ҡыҙыҡлы үткәрергә мөмкинлек бирә, шатлыҡ һәм ҡәнәғәтлек килтерә, шул арҡала улар, алыш-биреш һәм хеҙмәттәшлек итеү, эҙләнеү һәм ҡыҙыҡһыныу аша үҙҙәренә яңы дуҫтар таба.
Нумизматик коллекцияға битараф булмаған кешеләр барлығы ҡыуаныслы.
Әлегә Сибай музейында 699 тәңкә һәм ҡағыҙ банкнот теркәлгән. Уларҙың 149-ы күргәҙмәлә күрһәтелгән. Йыйыусылар әйтеүенсә, бөгөн хатта һирәк осрай торған тәңкә һатып алыу өсөн дә ҙур проблема юҡ. Уларҙы нумизматик магазиндарҙа ла, интернетта ла һатып алырға мөмкин.
– Яратҡан шөғөлөм арҡаһында күп дуҫтар барлыҡҡа килә, улар башлыса интернетта инде, – тип һөйләй Сафа Ишмөхәмәтов. – Социаль селтәрҙәрҙә әүҙем аралашабыҙ. Үҙ шөғөлөмә бирелгән кеше булараҡ, Үҙәк Банктың тәңкәләр сығарыуға ҡағылышлы хәбәрҙәрен, пландарын һәм анонстарын даими күҙәтеп торам.
Тәңкәләр – Сафа Вафа улының берҙән-бер мауығыуы түгел. Ул значоктар йыйырға, концерттарҙа һәм үҙешмәкәр түңәрәктәрҙә, спорт ярыштарында ҡатнашырға һәм хатта кинола төшөргә лә ваҡыт таба.
Кино геройҙары араһында һайлау комиссияһы рәйесе лә була
