«Йондоҙло табын»

Йәшелсә менән
бешкән тауыҡ

Уртаса ҙурлыҡтағы тауыҡты өлөштәргә бүлергә. Картуф, болгар боросо, ташҡабаҡ, һуғанды та­ҙартып, эре киҫәктәргә турарға. Уларға самалап тоҙ, соя соусы, “Чикен масала” һинд тәмләткесе, майонез, үҙемлек майы, ҡара борос һәм тауыҡ өсөн махсус “Карри-манго” соусы һалып, яҡшылап бутарға. Ит менән йәшелсә был маринадта бер сәғәт тирәһе ятып торорға тейеш. Ваҡыты-ваҡыты менән бутап алырға онотмағыҙ.
Табаға йәйеп һалғас, 180 градус ҡыҙыулыҡтағы мейестә 30 минут бешерергә.

Ҡыяр менән
балыҡтан ҡабымлыҡ

300 г һөйәкһеҙ сельдь балығын, 2 бешкән йомортҡаны һәм уртаса ҙурлыҡтағы 1 һуғанды ваҡ шаҡ­маҡтарға турарға. Уларға самалап тоҙ, ҡара борос, 5 ҡалаҡ үҫемлек майы һалып, бөтәһен бергә бутарға.
Ҡыярҙы йәшелсә таҙартҡыс ярҙамында биш йоҡа таҫма яһап, ҡырҡырға. Уларҙан ҡулсалар яһап, һәр береһен теш таҙартҡыстар ярҙамында беркетергә. Бер аҙ киптерелгән ҡара икмәк те­лем­дәренә ҡыяр ҡуласаһын ултыр­тырға. Эсендәге бушлыҡҡа ба­лыҡлы ҡатнашманы тултырырға.

Баллы торт

4 йомортҡаға 1 стакан бал, 150 г шәкәр һалып, күпергәнсе туғырға. 2 балғалаҡ сода, 3 стакан он, 1 стакан ваҡланған әстерхан сәтләүеге һалып болғатырға ла, өҫтөн ҡаплап, 3 – 4 сәғәт йылы урында тоторға.
Ҡамырҙы өс өлөшкә бүлергә. Фольганы үҫемлек майы менән майларға ла, шуның өҫтөнә ҡамырҙы йәйеп, 200 градус ҡыҙыулыҡтағы мейестә 5 – 7 минут бешерергә. Ҡалғандарын да шулай бешереп алырға.
400 г ҡаймаҡҡа 150 г шәкәр һалып туҡырға. Уны һәр йәймә өҫтөнә һылап, ҡатлап, тортты йыйырға. Тәүҙә әҙер торттың өҫтөнә 50 г шәкәр һибергә, аҙаҡ        1 стакан ваҡланған әстерхан сәтләүеге менән биҙәргә.

     Гөлнур ЮЛДАШЕВА.

https://ye102.ru/articles/mahsus/2023-05-07/yondo-lo-tabyn-r-mzil-s-lm-nov-3245273