Бөгөн - Халыҡ-ара яҙыусылар көнө.

Республикабыҙҙа "Китап" байрамын йыл һайын үткәреп ифрат та изге эш эшләйҙәр. Был байрамды, яҙыусылар, журналистар, ғөмүмән китапты үҙ итеп яратыусылар көтөп ала, һабантуй һымаҡ ҡабул итә. Китап, тигәндә, Рәшит ағай Солтангәрәевтың һөйләгәне гел хәтерҙә, уны бәғзе берәүҙәргә һөйләп ишеттергәнем бар, мәгәр Ҡөрьәнде ҡабатлау иманды арттыра ғына, ә яҡшы хәтирә донъяны өҫтәп яҡтырта, уға аҡыл, мәғәнә бирә.
Шулай итеп ағайҙың һөйләгәнен һүҙмә-һүҙ килтерәм.
"Студент саҡ. Ауылдан шаулы, минең өсөн ят башҡалаға уҡырға килдем. Бер кис курсташ ҡыҙым үтенгәс, уны ҡала ситендәге биҫтәгә оҙата киттем. Тегене фатирына ҡәҙәр еткереп ҡуйып, подъезд ауыҙында гәп һатып торғансы төн уртаһы ла етеп киткән икән. Ҡайтырға боролдом. Тирә-яҡ дөм ҡараңғы, ҡайҙа барырға ла белмәйем, уңғамы, әллә һулғамы?! Автобустар, трамвайҙар йөрөүҙән туҡтаған. Биниһая ваҡыт урынымда тапандым. Бер аҙ ҡурҡыта ла. Бына эргәмдән бер кеше үтеп китте, ҡулына ҙур ғына китап тотоп алған. Уйлап ҡуйҙым, был китап тотҡас, юлбаҫар түгел, һәйбәт кеше. Икеләнеүһеҙ уға эйәреп киттем. Ҡараңғы тротуарҙан, унда-бында боролоп, һуғылып апаруҡ барҙыҡ, һәм ниһайәт, был китаплы кеше мине ҡаланың үҙәгенә, яҡты еренә алып сыҡты!" Ағайҙың кинәйәһе менән әйтәм, йәмәғәт, китаптан һис ҡасан айырылмағыҙ, китап менән ҡалығыҙ, ә ул һеҙҙе һәр саҡ донъяның яҡты, нурлы еренә алып сығыр! Етеп килгән Китап-байрамы менән тәбрик итәм, ағай-эне, Халыҡ-ара Яҙыусылар көнө менән ҡотлайым!

Хәйҙәр Тапаҡов