"Тамсы ҡыҙыма - 15, үҙемә - 65"

Баймаҡ биләмә-ара үҙәк китапханаһында шағир, яҙыусы, журналист, Ш. Хоҙайбирҙин исемендәге дәүләт премияһы лауреаты, Башҡортостандың атҡаҙанған мәҙәниәт хеҙмәткәре, Салауат Юлаев ордены кавалеры Әхмәр-Ғүмәр Үтәбайҙың "Тамсы ҡыҙыма - 15, үҙемә - 65" исемле юбилей кисәһе үтте.

Сарала Башҡортостан Яҙыусылар союзы идараһы ағзаһы, яҙыусы Венер Исхаҡов, Баймаҡ районы хакимиәтенең эштәр буйынса идарасыһы Илгиз Байымов, яҙыусы Зөлфирә Ҡаҙаҡбаева, шағирә Айгөл Айытҡолова, шағир, "Һәнәк" журналының баш мөхәррире Илгиз Ишбулатов, Башҡортостандың атҡаҙанған мәҙәниәт хеҙмәткәре Луиза Ҡаһарманова, "Һаҡмар" гәзитенең баш мөхәррире Гүзәл Салихова, яҙыусының ғаиләһе, туғандары, класташтары, дуҫтары һәм башҡа хөрмәтле ҡунаҡтар ҡатнашты.

Йыр, бейеү, шиғыр менән үрелеп барған сарала һәр кем Әхмәр-Ғүмәр Үтәбайҙы 65 йәшлек юбилейы менән ҡотлап, изге теләктәрен еткерҙе.

Венер Исхаҡов яҙыусыны юбилейы менән Башҡортостандың Яҙыусылар союзы исеменән ҡотлап, Башҡортостан Хөкүмәте премьер-министрының беренсе урынбаҫары

Урал Килсенбаевтан ҡотлау хатын уҡыны. Ә алып барыусы Башҡортостан Башлығы Радий Хәбировтың телеграммаһы уҡып ишеттерҙе.

Кисәлә  тағы ла яҙыусының "Буранбай" романы тикшерелде. Тамашасылар авторға ҡыҙыҡһындырған һорауҙарын бирҙе. Мәҫәлән, ни өсөн бүлектәр хат тип атала? Романда һүрәтләнгән йолалар бөгөн һаҡланғанмы? Ни өсөн әҫәрҙә серәкәйҙәр образын файҙаланылған?...

Юҡҡа ғына сара "Тамсы ҡыҙыма - 15, үҙемә - 65" тип атамалған. Әхмәр-Ғүмәр Үтәбайҙың ҡыҙы Тамсы кисәнең биҙәге булғандыр. Теүәл 15 йыл элек, ошолай уҡ юбилей кисәһе ваҡытында телефон шылтырай һәм хәбәр яңғырай: "Әхмәр, ҡыҙың тыуҙы!"

Ә кисәнең иң аҙағында  Әхмәр-Ғүмәр Үтәбай тамашасыларға үҙ шиғырҙарын уҡыны.

Ҡәләмдәшебеҙҙе юбилейы менән ҡайнар ҡотлайбыҙ! Ғаилә именлеге, бәхет, уңыштар, ижади үрҙәр теләйбеҙ!

https://shonkar.com/news/novosti/2025-02-20/hm-r-y-y-tyu-y-4130493