“Әрме” әле лә уның иң яратҡан йыры

Тыуып-үҫкән ерҙәрҙән алыҫ яҡтарҙа, хисле ир-егет йөрәге сыҙап булмаҫлыҡ итеп туған моңдарҙы һағына. Еҙ май торбаһы табып алған Рәмил, уны йышып таҙалап, ҡурай оҙонлоғо итеп ҡырҡып ала, тишектәрен уйып, ҡәҙимге йөрәк һағышын баҫырлыҡ ҡурай әтмәләп ала. Диңгеҙҙән ярға сыҡҡан араларҙа, төнъяҡтың ҡотһоҙ утрауҙарының сусаҡ тауҙарына сығып, тыуған Башҡортостанының йәшел урманлы, зәңгәр ҡаялы тауҙарын, күк Ирәндеген күҙ алдына килтереп, ул башҡорт халыҡ йыры “Әрме”не һуҙып ебәрә. Үҙе йырлай, йөрәгендә урғылған көслө моң тәъҫиренән үҙе илай... Башҡорт халыҡ йырҙарының асылын, киңлеген, һәр һүҙендә түгелеп торған хис тәрәнлеген аңлау, үҙәк өҙгөс һағыныу кисергән һалдат күңелендә ана шулай ярала. “Әрме” әле лә Башҡортостандың атҡаҙанған мәҙәниәт хеҙмәткәре, Рәмил Париж улы Туйсиндың иң яратҡан йыры.