ТЕАТР ҺӘМ КИНО МИНЕ АРБАНЫ

Башҡа төр һөнәр эйәһе булып та, артабанғы яҙмышын сәнғәт өлкәһе менән бәйләүселәр ҙә бар. Мәҫәлән, шағир, яҙыусы, драматург Наил Ғәйетбай Магнитогорск ҡалаһының тау-металлургия институтын тамамлап, инженер-механик һөнәрен үҙләштерә. Кемеров өлкәһендәге, артабан Сибай ҡалаһындағы заводтарҙа эшләп, инженер дипломын алыуына ун йылдан ашыу ваҡыт үткәс, Юғары әҙәбиәт курстарын (СССР Яҙыусылар союзы ҡарамағында), Юғары театр курстарын (ГИТИС ҡарамағында) тамамлай. Ике йә өс дипломлы режиссерҙар һирәк булһа ла, осрай. Бөгөнгө геройыбыҙ рәссам-ҡораусы, механик-инженер, кино һәм телевидение режиссеры һөнәрҙәрен үҙләштереүсе Руслан Юлтаев. Василий Лановойҙың (совет һәм Рәсәй актеры, тасуири һүҙ оҫтаһы, йәмәғәт эшмәкәре, театр уҡытыусыһы), Николай Бурляевтың (совет һәм Рәсәй актеры, кинорежиссер, йәмәғәт эшмәкәре – депутат), Борис Грачевскийҙың (совет һәм Рәсәй кинорежиссеры, актер, сценарийҙар авторы), Юрий Кара (совет һәм Рәсәй кинорежиссеры, сценарийҙар авторы, продюсер, актер), Ренат Дәүләтйәровтарҙың (Рәсәй продюсерҙары гильдияһының президенты) үҙ ҡулдарынан дипломдар һәм бүләктәр алған яҡташыбыҙ. Яҙмышының үҙенә тәғәйен юлын урау-урау юлдар аша тапҡан Руслан Сәмерхан улына һүҙ бирәйек. Бына нимәләрҙе бәйән итте ул:

– Күмертау районының Ермолаевка ауылында тыуып үҫтем, Ырымбур, Силәбе өлкәләрендә лә йәшәп алдыҡ. Шулай ҙа мәктәпте Ермолаевкала тамамланым. Рәссам-ҡораусыға уҡып сыҡтым. Ижад юлына килеүемә сәбәпсе булған бер ваҡиға бар. Атайым колхозда водитель булып эшләне. Бер көндө ул Морапталдан Ҡыҙыл Маяҡҡа барышлай юл ситендә ятҡан ҡара төҫтәге тоҡсайҙы күреп ҡала. Туҡтап, уны асып ҡарай, тоҡсай эсендә фотоаппарат ятҡан була. Яңылыштан төймәһенә баҫа һәм яҡтылыҡтан эсендәге таҫмала булған фотоһүрәттәр юйыла. Атайым ул фотоаппаратты үҙе менән бик оҙаҡ йөрөтә, кешеләрҙән һораштыра, әммә уның хужаһы табылмай. Әсәйемдең атаһы Сибәғәт Тайыпов һәм атайымдың бер туған ҡустыһы Әмирхан Юлтаевтар күптәнән инде фото төшөрөү менән мауыға ине. Әмирхан олатайымдың кинокамераһы ла булды. Атайым фотоаппарат менән фото төшөрә башланы, был мөғжизәле эшкә мине лә йәлеп итте. Йөҙләп таҫма, фото сығарғыс (проявитель), нығытҡыс (закрепитель), фотоны ҙурайтҡыс, ҡыҙыл төҫтәге лампа кеүек кәрәкле терминдарҙы, уларҙы нисек файҙаланырға икәнлекте үҙләштерҙем, ҡыҙыҡһыныуым, әлбиттә, көслө булды.

Бер мәл атайымдар «Сони» кинокамераһы һатып алды. Мин ятаҡханала дуҫтарым менән юмористик сюжеттар төшөрөргә керештем. Өфө нефть институтын (хәҙерге ӨДНТУ) тамамлап, Ермолаевкалағы «Көйөргәҙе спирт-араҡы комбинаты»нда эшләй башланым. Әммә ни бары ярты йыл ғына эшләй алдым, сөнки мин ул эштә үҙемә һис бер толҡа тапманым.

2001 йылда атайым Республика киноһөйөүселәр предприятиеһы директорҙарының кәңәшмәһендә ул саҡтағы «Башҡортостан» киностудияһы директоры Рәйес Исмәғилев менән осраша. Минең видеолар төшөрөү менән мауығыуым тураһында белгәс, ул атайыма: «Әйҙә, беҙгә килһен! Киностудияға кешеләр кәрәк. Тиҙҙән ике фильм төшөрә башлаясаҡбыҙ», – тип әйтә. Алда атай-әсәйем менән ул турала ныҡлы ғына һөйләшеү тора ине. Ҡапыл ғына яҙмышымды үҙгәртеүгә улар нисек ҡараясаҡ бит әле. Шул ваҡытта әсәйем минең өсөн ғүмеремдәге иң мөһим һүҙҙәрҙе әйткәндер: «Үҙең хәл ит, улым. Нисек кенә булмаһын, беҙ һиңә һәр ваҡытта ла ярҙам итәсәкбеҙ».

Рәйес Абдрахман улы мине ике режиссер – Булат Йосопов һәм Айсыуаҡ Йомағоловтар менән осраштырҙы. Булат менән бер-беребеҙҙе электән белгәндәй, тиҙ арала уҡ уртаҡ тел таптыҡ.

Мауыҡтырғыс мәҡәләне тулы килеш "Тамаша" журналының яңы февраль һанында уҡый алаһығыҙ.

Автор:

Читайте нас:

Шулай уҡ уҡығыҙ