+24 °С
Болотло
75 лет Победы
Бөтә яңылыҡтар

Күңелендә дала иркенлеге

Хәйбулла районы Әбеш урта мәктәбе көслө уҡытыусылары менән элек-электән дан тота. Талантлы педагогтар илебеҙгә белемле уҡыусылар тәрбиәләп кенә ҡалмай, үҙ өлгөһө менән ауылдың мәҙәни донъяһын да, рухи көсөн дә тәшкил итә. Алыҫ төпкөлдә урынлашҡан Әбеш ауылын районда ғына түгел, республика һәм ил кимәлендә күтәреп, данлап, хеҙмәте менән халыҡ араһында оло хөрмәт ҡаҙанған кешеләр улар. Бына ошондай илһөйәрлек тойғолары менән һуғарылып үҫкән ғаиләлә тыуған Яҙыҡбаева Рита Солтан ҡыҙының Республика мәҙәниәт донъяһында ҡайнап йәшәүе бер ҙә ғәжәп түгел. Әсәһе, Байгилдина Алһыу Абдулла ҡыҙы башҡорт теле һәм әҙәбиәте уҡытыусыһы. Рәми Ғарипов менән бер класта уҡып, әҙәбиәт һәм шиғриәт һөйөүсе үҫмер булып ҙурая. Атаһы – Байгилдин Солтан Йосоп улы көслө спортсылар әҙерләүсе физкультура уҡытыусыһы булараҡ Башҡортостанда киң билдәле. Ҡышҡыһын район саңғы ярышына ДТ тракторына тейәлеп, толоптарға уранған Әбеш мәктәбе спортсылары килеп төшөп, ағас саңғыларын кейеп ярышҡа баҫһа, башҡа ауылдарҙың махсус кейемле һәм пластмас саңғылы уҡыусылары өмөтһөҙләнеп, ярышып тороуҙың файҙаһы юҡлығын аңлап, саңғыла йүгереүҙән баш тартыр булғандар. Күңелдәренә көслө рух орлоҡтары һалған атай-әсәйҙең ужымлы шытымы булып был ғаиләлә бөгөнгө геройыбыҙҙың апаһы – атҡаҙанған мәҙәниәт хеҙмәткәре, билдәле сәсәниә Ғәйнуллина Асия Солтан ҡыҙы ла булыуы, уларҙың тамырҙары ни тиклем һутлы һәм көслө икәненә асыҡ дәлил инде. Кескәй Рита бәләкәйҙән сәхнәгә ынтылып үҫә. Мәктәптә уҡығанда тасуири итеп шиғырҙар һөйләргә яратһа, ҙурая килә матур кейемдәре, һығылмалы хәрәкәттәре менән һәр үҫмер ҡыҙҙың һушын алған һинд һәм үзбәк ҡыҙҙары бейеүҙәрен бейеп өйрәнә. Үҙе лә ҡара ҡашлы, ҡара күҙле, һинд актрисаларына оҡшап торған бейеүсе ҡыҙҙы бер концерттан ҡалдырмай алып йөрөй башлайҙар - 

Сәхнәгә ғашиҡ талантлы ҡыҙыҡай сәнғәт институтына бер ауырлыҡһыҙ уҡырға инә. Студент тормошонда ҡайнап йөрөгән Ританы Ырымбур өлкәһенең Әхмәтхан исемле сая егете эләктереп тә ала. Һөйөклө кәләшен гастролдәрҙән ҡайтып килә алмаҫ сәнғәт кешеһе итеп күрергә теләмәгән егет уға икенсе һөнәр алырға кәңәш итә. Рита Башҡорт дәүләт педагогия институтын тамамлай. Уҡыуҙа ла, институттың йәмғиәт эшендә лә әүҙем ҡыҙҙың телем, илем тип янып йөрөүе һөҙөмтәһе булып БДПИ ла башҡорт факультеты барлыҡҡа килә. Республикабыҙҙа үҙаллылыҡ алыу алдынан барған аңлатыу-ағартыу эштәре менән райондарҙа күп эштәр башҡара ул студент ҡына көйө. Башҡорт-төрөк лицейын барлыҡҡа килтереүҙәге ойоштороу эштәрен дә ул үҙ иңдәренә ала. Институтты яңы ғына тамамлаған белгескә төрөктәрҙе башҡортсаға өйрәтеү кеүек яуаплы эш тапшырыла. Фән эштәре буйынса директор урынбаҫары вазифаһын да алып бара.

Әммә ойоштороу һәләте көслө ҡыҙ мәҙәниәт мөхитендә эшләүҙең күңеленә яҡыныраҡ икәнен аңлап, шул йүнәлештә әүҙемлек күрһәтә.

 

Мәҡәләне тулы килеш 12 август сығасаҡ журналыбыҙҙың яңы һанында уҡырһығыҙ. 

Күңелендә дала иркенлеге
Күңелендә дала иркенлеге
Автор:
Читайте нас в