Гәзиттән... матур һауыттар

Сәүиә апай Ғафури районы Усман ауылында тыуып үҫкән. 10-сы синыфты тамамлағас, Өфөлә маляр булып эшкә инә. Унан Салауат ҡалаһына, төҙөлөш материалдары заводына урынлашып, шунда 35 йыл эшләп, хаҡлы ялға сыға. Салауат ҡалаһында улы, ҡыҙының ғаиләһенә таяныс булып йәшәй Сәүиә апай.Тормошоноң иң оло йыуанысы, ҡыуанысы - 3 ейәне, ике ейәнсәре бар.Был үҙенсәлекле шөғөл менән 4 йыл булыша икән. "Миңә был эште бер таныш ҡатын күрһәтеп кенә биргән ине, үҙем тырышып өйрәнеп алдым. Кешеләр өйгә килеп заказ бирәлар, һатып та ебәрәм. Кәрзинкә, вазаға заказдар күп, ти оҫтабикә.Эшләү сере менән дә уртаҡлашты -

- Сауҙа үҙәктәренең реклама гәзиттәренән эшләйем. Туғандарға бүләк итеп таратам. Бөтә туғандарҙа ла бар минең эшләгән эйберҙәрем, ти ул ҡыуанып.
Гәзитте уртаға киҫеп, оҙон энә менән уратаһың. Бер яҡ башы осло, икенсе яғы киңерәк була, елем менән йәбештерер өсөн урын ҡалдырырға шулай эшләнә. Нәҙек кенә торбаҡайҙар килеп сыға.
Илһам килгәндә күңел өсөн шундай ябай, әммә матур әйберҙәр эшләй оҫта ҡуллы ҡатын - Сәүиә Камалова.

Миләүшә Ҡыҙрасова.

Автор:

Читайте нас: