Икенсе курсты тамамлағас, уҡыуын ҡалдырып тороп, армияла хеҙмәт итеп ҡайтырға ла тура килә Х.Әхмәтов исемендәге Башҡорт дәүләт филармонияһы йырсыһы, Башҡортостандың халыҡ артисы, Ш.Бабич исемендәге премия лауреаты Вәхитк Хызыровҡа. Йыр онотолоп тора. Моңға маһир башҡа һалдаттар һымаҡ үҙешмәкәр сәнғәт сәхнәләрендә йырларға теләмәй ул. «Йырлап йөрөүҙе хеҙмәт итеү тип ҡабул итмәйем мин», — ти Вәхит Хызыров.
Армиянан һуң уҡыуҙы дауам итеү еңелдән булмай, әлбиттә: талаптар икенсерәк, төркөмдәштәр башҡа, уҡытыусыларҙың да күбеһе алмашынған. Уҡылғандар онотолған. Әммә булмыштағы сәм һәм һайлаған һөнәреңә мөхәббәт ауырлыҡтарҙы еңеп сығырға ярҙам итә.
«Ижад кешеһе өсөн талант төшөнсәһе мөһимерәкме, әллә тырышлыҡмы?» тигәндә, уларҙың икеһен дә бер юғарылыҡҡа ҡуя Вәхит Ғәлибай улы. Әлбиттә, тыумыштан бирелгән һәләтең булмаһа, ҡоро тырышлыҡ менән әллә ҡайҙа китеп булмай, ә инде һәләтеңде тырышлыҡ ярҙамында талант дәрәжәһенә үҫтермәһәң, шулай уҡ, бер ни ҙә килеп сыҡмай.