+12 °С
Ямғыр
Бөтә яңылыҡтар
Мәҙәниәт һәм сәнғәт
10 Сентябрь 2020, 17:00
Фәнил БҮЛӘКОВ, «Йөрәк һүҙе» телевизион конкурсында 2-се урын яулаусы (2018)
Был шиғырҙы мин оҙаҡ уйланып яҙҙым. Унан һуң минең баҡсама таш атыусы ҡәләмдәштәрем дә табылды. Ел икенсе яҡҡа иҫә башлағас яҙҙыңмы, тиеүселәр ҙә булды.
Мортаза Рәхимов тураһындағы шиғырың менән шунда уҡ тамашасыны үҙеңә ҡараттың, тиҙәр. Был шиғырҙың тыуыу тарихына туҡталғанда...
Мортаза Рәхимов минең өсөн ныҡ хөрмәт икән шәхестәремдең береһе. Хеҙмәт юлымды ла ул ойошторған Башҡортостан юлдаш телевидениеһында башланым. “Тамыр” студияһында 7 йыл эшләнем. Шул осорҙа уҡ Ил ағаһының үҙ халҡына, республикаһына, теленә булған мөнәсәбәтен күреп, һоҡлана, хөрмәт итә торғайным. Һигеҙ йылға яҡын ауыл хакимиәте башлығы булып эшләү дәүерендә халыҡ араһында ла уның хаҡында гел йылы һүҙҙәр ишеттем.
Был шиғыр ярамһаҡланыу хисенән яралманы, ә нисәмә йылдар йөрәкте өйкәп торған йөрәк һүҙе ине. Был шиғырҙы мин оҙаҡ уйланып яҙҙым. Ошо сығыштан һуң минең баҡсама таш атыусы ҡәләмдәштәрем дә табылды. Ел икенсе яҡҡа иҫә башлағас яҙҙыңмы, тиеүселәр ҙә булды.
Ил ағаһы ниҙәр кисергәнен бары үҙе генә белә. Был шиғыр уның кисерештәренең меңдән бер өлөшөн генә асып биргәндер. Шәхестәребеҙҙе үҙҙәре тере саҡта хөрмәт итә беләйек. Ҡыҙғаныс, беҙҙең башҡортта бөйөктәр үлгәс үкһеп илайбыҙ, күккә күтәреп маҡтайбыҙ.
Фәнил БҮЛӘКОВ
ИЛ АҒАҺЫН КҮРГЕМ КИЛӘ
Салауаттың язаһынан
Үткән, балам, күп ғүмер.
Тик тарихтың усағында
Һүнмәгән ошо күмер.
Баҙлап ҡына ятҡан утта
Ҡыҙа, ҡыҙара тимер.
Илһөйәрҙәргә баҫыла
«Милләтсе» тигән мөһөр.
Телһөйәрҙәргә тағыла
Шул уҡ «Милләтсе» һүҙе.
Һуҡыр булып ҡала күптәр
Булһа ла күрер күҙе.
Ил ағаһы исемен дә
Әйтеү беҙгә тыйылды.
Ҡол булдыҡмы, ҡурҡаҡмы беҙ –
Өндәребеҙ тығылды!..
Ил ағаһы һигеҙ йылға
Тере килеш күмелде!
Ошо ауыр хыянат гел
Ҡырып тора күңелде.
Һуҡыр булып ҡала күптәр
Күрһә лә күрер күҙе,
Тигән инең миңә, атай,
Әсенеп кенә үҙең,
Ни хаҡта ине һүҙең?
Ил ағаһын рәнйеттек беҙ,
Шул хаҡта ине һүҙем.
Хурлыҡтан бит күптәребеҙ
Йәшерҙе күргән күҙен.
Беҙҙең барлыҡ үткәндәрҙе
Тарих битенә яҙа.
Нисек нахаҡты кисерҙең,
Ил ағаһы Мортаза?
Бөгөн килеп данлайбыҙ ҙа
Һинең оло исемде,
Ярамһаҡҡа индермәгеҙ,
Зинһар, минең есемде.
Теҙләндерер саҡта донъя
Һынманы халҡым улы.
Милләтенә һуҙҙы һәр саҡ
Мәрхәмәт тулы ҡулын.
Ил уланы башын эймәй,
Халҡына булды ҡалҡан.
Ялғандан тормош тирмәне
Яһай һәр саҡ он-талҡан.
Ил ағаһын күргем килә,
Ул бит миңә олатай.
Ул төҙөгән мәктәпкә лә
Мин йөрөр инем, атай...
Ил ағаһы арабыҙҙа,
Милләтемдең ул ҡото,
Йөрәгенә өмөт һалып,
Уятты ул башҡортто.
Ил уланы үҙ халҡының
Рухын ҡурсыған атай.
Иле өсөн янып көйгән
Аҡһаҡал ул – олатай.
Ул астырған күп мәктәпкә
Эленгән бөгөн йоҙаҡ.
Халҡым киләсәге өсөн
Ҡоролған ошо тоҙаҡ.
Сабылған беҙҙең тамырға
Милләт ҡанһырар балта,
Туған телем киләсәген
Томандар тора ҡаплап.
Үҙ телемдә уҡытырға
Яҙам һиңә ғариза.
Киләсәгем ҡайҙа илтер
Эштәр ҡалғас ҡағыҙға?
Хаҡлыҡ ҡалҡа, һыуға батмай –
Ошо дөрөҫмө, атай?
Беҙ башҡорттар булырбыҙмы,
Шул борсой мине, атай?
Башҡорттарҙың киләсәге
Берҙәмлектә, берлектә.
Илен яҡлап һүҙен әйтеү
Яҡлай алыу, ирлектә.
Берҙәмлектең усағында
Гел дөрләп торһа ялҡын,
Дәүерҙәрҙе атлап сығыр
Илһөйәр ғәзиз халҡым.
Хөрмәт итһә үткәндәрен,
Телһөйәр булһа балам –
Киләсәккә милләтемдең
Ышаныс менән бағам!
***
Заманаһы шулай...
Өнһөҙҙәргә рәхәт
Үҙ һүҙҙәрен әйтә алмаған.
Тирә-яҡта тынлыҡ... вайымһыҙлыҡ...
Беҙҙе, кешеләрҙе, ялмаған.
Үткәндәргә ҡарайбыҙ ҙа, бөгөн
Киләсәктән әллә өркәбеҙ.
Өйөрөнән яҙған бүреләр беҙ,
Нисек булыр беҙҙең иртәбеҙ?
Өнһөҙҙәр беҙ, телһеҙҙәр ҙә беҙ бит...
Айға ҡарап бөгөн олорлоҡ.
Балаларға яттар телен һалып
Үҫтерәбеҙ ыулы бер орлоҡ.
Өйөрһөҙ беҙ... яңғыҙ бүреләрҙе
Аулауҙары еңел тоҙаҡҡа.
Берҙәмлектең хисен йөрәктәге
Бикләгәнбеҙ оло йоҙаҡҡа.
Күп бүреләр сәйер кеүек хәҙер:
Ҡойроҡтарын болғай эттәрсә,
Йәшәүҙәре бөгөн еңелерәк
Өрөп сыҡҡан бәйһеҙ эттәргә.
***
Ҡыҙҙарымдың күҙҙәренә бағам да мин,
Йәшәүемдең мәғәнәһен табам да мин.
Йән-усаҡҡа өмөт өҫтәр ҡуҙҙарым да,
Был тормошта ҡанат ҡуйған ҡыҙҙарым да.
Ғүмеремдең үкенмәйем аҡҡанына,
Ҡояш ҡалҡып иртәгәсә батҡанына.
Йыуанысым, ҡыуанысым – ҡыҙҙарымда,
Ҡара төндә балҡып торған нурҙарымда.
Аҡланмаған өмөттәрҙе юғалтмайым,
Мин үҙемде һис ҡасан да йыуатмайым.
Ҡошсоҡтарым, өмөтөмдөң нурҙары ла,
Тормошомдоң иң моңло ла йырҙары ла.
Ынйыҡайҙар, һыйыналар ҡосағыма,
Мин бәхетле үҙем яҡҡан усағымда.
Бәхетте мин гел теләйем ҡыҙҙарыма,
Йөрәгемә ялҡын биргән ҡуҙҙарыма.
Читайте нас:
© 2024 "ТАМАША" Республика мәҙәниәт һәм сәнғәт журналының сайты.
Сайт Республиканского журнала культуры и искусства "ТАМАША".
Ойоштороусылары: Башҡортостан Республикаһының Матбуғат һәм киң мәғлүмәт саралары буйынса агентлығы; Башҡортостан Республикаһының "Республика Башкортостан" нәшриәт йорто дәүләт унитар предприятиеһы.
Учредители: Агентство по печати и средствам массовой информации Республики Башкортостан; Государственное унитарное предприятие Республики Башкортостан Издательский дом "Республика Башкортостан".
Зарегистрирован Федеральной службой по надзору в сфере связи, информационных технологий и массовых коммуникаций 5 ноября 2015 года. Свидетельство о регистрации ПИ № ТУ02-01477
Телефон
(347)292-77-64
Электрон почта
Адресы
450079, Республика Башкортостан, г. Уфа, ул. 50-летия Октября, 13, каб. 612