БЫУАТТАРҘАН КИЛӘ МОҢ СЫЛБЫРЫ

Улар йырлағанда, ысынлап та, моңло тауыштары саҡма таштай күңелгә ҡағылып, йөрәктә осҡондар тыуҙыра, яндыра, ялҡынландыра һәм мең төрлө хискә күмә. Башҡортостандың атҡаҙанған артисы, бөтә Рәсәйгә билдәле тенор, Башҡорт дәүләт опера һәм балет театрынан тыш күрше-тирәләге атаҡлы Екатеринбург, Силәбе, Пермь, Ҡазан ҡалаларының опера театрҙары менән хеҙмәттәшлек иткән, хатта Мәскәүҙең Ҙур театры һәм Петербургтың Мариинск театрҙары сәхнәләрендә лә йырлаған Илһам Вәлиев һәм уның улы, йәш йондоҙ, башҡорт телендә үҫмерҙәр өсөн «Тамыр» каналы тарафынан төшөрөлгән тәүге «Бирешмә» сериалында уйнаусы актер, йырсы, быйыл ғына Мәскәүҙең Гнесиндар исемендәге Рәсәй музыка академияһы студенты булып киткән Хәйҙәр Вәлиевтар тураһында бара һүҙ.