Заман һәм шәхес

Алҡыштар бит алдамай

Стәрлетамаҡ башҡорт драма театрында эшләгән талантлы актерҙарҙы, режиссерҙарҙы, етәкселәрҙе өлгөлө ғаилә башлыҡтары, ғаилә тотҡалары тип тә беләбеҙ. Хәйер, беҙ үҙебеҙ ҙә ҙур һәм татыу бер ғаилә бит! Күп һөйләп тормайым, һәләтле артист, өс бала атаһы, уңған ғаилә башлығы Илгиз ӘКИМБӘТОВтан интервью алырға ашығам.

«Ғаилә хәле?» – тип һораулы ҡараш ташлауым булды...

– Илназға – 12 йәш, Гөлназға – 10, кесе улым Айназға – 2 йәш, – тип теҙеп тә китте Илгиз.

Шул ваҡытта уның күҙендә балҡыған нур сатҡыларын күрһәгеҙ ине! Әсәйҙәр өсөн был хас һыҙат кеүек, ә бына ғорур һәм хис-тойғоларын бик күрһәтеп бармаған атай күҙҙәрендә ҡәнәғәтлекте күреү икеләтә һөйөнөс уятты. Шулай ҙа һөйләшеүебеҙҙе ғаилә башлығының үҙенән башларға булдыҡ.

Башҡорт драма театрының талантлы актеры Илгиз Әкимбәтов – Стәрлебаш районының Үрге Шәкәр ауылы егете. Артист һөнәренә нисек «тәгәрәнең» тигән һорауҙың яуап башы мәктәпкә барып ялғанды. Ауылдағы мәктәптә, һуңынан Стәрлетамаҡтағы 2-се лицей-интернатында ойошторолған драма түңәрәктәрендә әүҙем йөрөй һәм тап ошонда үҙенең буласаҡ һөнәренә юл һала ул. Өйрәтеүселәре лә бынамын тигән булғандыр инде, сөнки егеттәрҙе артист булырға өгөтләп тә әле саҡ-саҡ...

Бөтәһе лә бәйләнеп кенә килеп, 1996 йылда тормош юлы Илгизде Өфө дәүләт сәнғәт институтына алып килә. Стәрлетамаҡ дәүләт башҡорт драма театры өсөн әҙерләнгән махсус курста уҡыу бәхетенә ирешә һәм 2000 йылда дипломлы артист булараҡ ҡалабыҙҙа эш башлай.

Беренсе ролен әле һаман хәтерләй Илгиз. Туфан Миңнуллиндың «Диләфрүзгә дүрт кейәү» комедияһында (режиссеры – К.Исламғолова) Исмәғил ролен башҡара ул. Ҡалыплашҡан һорауҙарҙан ҡасып, «Ниндәй ролеңде йәиһә ролдәреңде яратмай уйнаның», – тип туранан-тура һораным артистан. Яуап та ҡыҫҡа булды:

– Бөтәһен дә яратам, бигерәк тә, балалар шатланып ҡараған әкиәттәрҙә уйнарға ихласмын, – тине Илгиз.

Шулай, ул балалар ярата! Тик образдарға ауырыраҡ инеп китеүе, уны яйлап үҫтереүе, байытыуы, йән өрөүе тураһында ла йәшермәй актер. Илгиз менән тулыһынса килешәм, бәлки, шуғалыр ҙа сәхнәлә уйнаған һәр роле үҙенсәлекле, хас Илгизсә генә еренә еткерелгән, «тәмле» генә. Халыҡ әйтмешләй, ҡыланһа ла килешә, йылмайһа ла килешә. Мәҫәлән, Туфан Миңнуллиндың «Ай булмаһа, йондоҙ бар» драмаһында Мәҙинәнең ағаһы Исхаҡты уйнауы тамашасыны ғына түгел, хатта көн һайын уны сәхнәлә күреп өйрәнгән коллегаларын да хайран итте. Ул шул тиклем килештереп уйнай, тамашасы изге төшөнсәләрҙе аяҡ аҫтына һалып тапаған, әсә урынына аҡсаны нығыраҡ үҙ иткән Исхаҡты хатта күрә алмаҫлыҡ хәлгә етә.

2015–2016 йылдарҙағы ижад миҙгелендә театр эсендә ойошторолған бәйгелә «Иң яҡшы йыл актеры» номинацияһында еңеүе тап ошо хаҡта һөйләйҙер. Шуныһы ҡыҙыҡ, Илгиз Әкимбәтов уйнаған роль шул тиклем уға «йоға», башҡа кешене уның урынында күҙ алдына килтереүе лә ҡыйын. Бәләкәй генә образын да, ҙурын да берҙәй үк күңел биреп башҡара актер. Баязит Бикбайҙың «Ҡоҙаса»һында бер генә тапҡыр сәхнәлә күренеп китә тигәндәй, әммә тамашасыны шунда ла арбарға өлгөрә! Алҡыштар бит алдамай.

Әле яңыраҡ ҡына театрҙа ҡуйылған М.Задорновтың «Килдең, киттең, хуш, байғош!» комедияһында (режиссеры – А.Зарипов) Андрей образын шул тиклем бирелеп уйнаны, хатта тамашасы менән сәхнә араһындағы сик юҡҡа сығып бер бөтөнгә әйләнде. Тормоштағы кеүек. Беҙҙең арала ниндәй генә яҙмышлы әҙәмдәр юҡ, әммә улар барыһы ла абынһа ла, аҙашһа ла йәшәүгә хоҡуҡлы. Тик ошо йәшәүҙә Кеше тигән исемгә тап төшөрмәй, бер-беребеҙгә йөҙ менән боролһаҡ ине. Бына ниндәй уйҙарға алып төшөп китте артистың образға инеүе. Бына шулай ул беҙҙең Илгиз Әкимбәтов – барыһын да ауыҙына ҡарата!

Йәнә ғаиләһе хаҡында! Кәләше Нурзиләне лә йыраҡтан эҙләмәй Илгиз, үҙҙәренең ауылынан ете саҡырымда ғына ятҡан Һарайҫа (халыҡ атамаһы) ауылынан әйттерә. Әйткәндәй, йәштәрҙе таныштырған да, ҡауыштырған Стәрлетамаҡ була. Матур ҡала, йәшлек ялҡыны, тәүге һөйөү – былар барыһы ла ғаилә башланғысына юл ала. Ул замандарға хас булғанса, ике яҡта ла гөрләтеп туй яһайҙар һәм быйыл бергә йәшәүҙәренә 15 йыл үтеп тә киткән. Һоҡланабыҙ, ғорурланабыҙ, өлгө алабыҙ!

Илгиз Ишмырҙа улы менән һөйләшә торғас, уның төрлө рецептар табып бик тә тәмле итеп бешереүен, бер туған тырыш, ныҡышмал ике ҡустыһы булыуын да белдем. Һәм... иртә генә атайһыҙ ҡалған Илгиздең кесе туғандарына терәк-таяныс булыуын аңлағас, был шәхесте бөтөнләй икенсе яҡтан да астым. Хәстәрлекле атай – хәстәрлекле ағай ҙа икән!

Илгиз Ишмырҙа улының әйткән теләктәрен «Тамаша» журналын уҡыусыларға еткереүем менән сикһеҙ ҡәнәғәтмен:

– Балалар шатлығында һәм донъя тыныслығында йәшәйек, һәр кемдең күңеле изгелек һәм сафлыҡ менән тулһын, сәләмәтлектән Хоҙай айырмаһын! – тип тамамланы ул һүҙен.

Ә Илгиз Әкимбәтовҡа, талантлы егетебеҙгә, маҡтауға лайыҡ, тамашасы үҙ иткән актерыбыҙға, хәстәрлекле ғаилә башлығына яңынан-яңы ролдәр һәм барлыҡ хыялдарының тормошҡа ашыуын теләйбеҙ.

Гөлдәр СОБХАНҒОЛОВА,

театрҙың әҙәбиәт бүлеге етәксеһе

Читайте нас:

© 2024 "ТАМАША" Республика мәҙәниәт һәм сәнғәт журналының сайты.
Сайт Республиканского журнала культуры и искусства "ТАМАША".
Ойоштороусылары: Башҡортостан Республикаһының Матбуғат һәм киң мәғлүмәт саралары буйынса агентлығы; Башҡортостан Республикаһының "Республика Башкортостан" нәшриәт йорто дәүләт унитар предприятиеһы.
Учредители: Агентство по печати и средствам массовой информации Республики Башкортостан; Государственное унитарное предприятие Республики Башкортостан Издательский дом "Республика Башкортостан".

Зарегистрирован Федеральной службой по надзору в сфере связи, информационных технологий и массовых коммуникаций 5 ноября 2015 года. Свидетельство о регистрации ПИ № ТУ02-01477

Телефон

(347)292-77-64

Электрон почта

[email protected]

Адресы

450079, Республика Башкортостан, г. Уфа, ул. 50-летия Октября, 13, каб. 612