Ыуыҙ һөтөнән ризыҡтар

Һеҙҙең иғтибарға Баймаҡ районының Икенсе Этҡол ауылынан Нәйлә Нотфуллинаның ысулын тәҡдим итәбеҙ:

0,5 банка ыуыҙ һөтө,
ярты балғалаҡ тоҙ,
бер балғалаҡ шәкәр,
5-6 аш ҡалағы көнбағыш майы,
бер стакан йылы һыу (ыуыҙ һөтө ныҡ ҡуйы булған осраҡта ғына).
Йомшаҡ ҡына ҡоймаҡ килеп сыға.

Ыуыҙ һөтөнән тағы бер үҙенсәлекле ризыҡ әҙерләйҙәр. Йылайыр районының Сәләх ауылынан Шәрифә Иҫәнбаева ыуыҙҙан сыр эшләргә өйрәтә. Ете йөҙ грамлыҡ банкаға ҡойолған ыуыҙ һөтөнә бер семтем тоҙ, сода һалып, бер аш ҡалағы көнбағыш майы ҡойоп болғатып, 15 минутҡа мейескә ҡуяһың. Ыуыҙҙан сыр әҙер.

Ыуыҙ һөтөнән аш:

Тәүҙә һауған һөттө һөҙәһең һәм бер нисә сәғәт һалҡында тотаһың. Һуңынан уны һүлпән генә утҡа ҡайнатырға ҡуялар. Ыуыҙ ҡайнап сыҡҡас, ике (ҡаты һәм шыйыҡ) өлөшкә бүленә. Ҡатыһы — ыуыҙ, шыйығы — ыуыҙ һүле була. Ыуыҙҙы һөҙөп алып һарҡыталар һәм ҡатыралар. Һүлендә аш әҙерләйҙәр. Еңелсә ҡыҙҙырылған һуған, тәмләткестәр ҡушалар, һурпа ҡайнап сығыу менән һалма һалына. Өлөштәргә бүленгән ыуыҙ төшөрөп, бер нисә минут бешереп алалар. Өҫтәлгә әҙер ыуыҙ ашын ҡорот йәки ҡатыҡ менән бирәләр. Ашҡа картуф ҡушып бешерергә лә мөмкин.

Ыуыҙ һөтөнән тағы бер сыр эшләү ысулы:

Кемгә ниндәй тәмләткестәр оҡшай ыуыҙға шуны ҡушырға мөмкин. Һарымһаҡ, борос, укроп алырға була. Уларҙың барыһын да бергә һалып, яҡшы ғына итеп болғатырға кәрәк. Мөмкин тиклем бейегерәк кәстрүл алып, массаны шунда ҡойорға кәрәк. Был мотлаҡ. Сөнки сыр ныҡ ҡына ҡалҡасаҡ. Тағы ла шуныһы – сыр әҙерләгән массаға йөҙөм, күрәгә, ҡара емеш тә ҡушырға мөмкин. Ҡыҫҡаһы, кем нимә теләй, шуны ҡуша ала. Әсе яратҡандар һарымһаҡ, укроп, борос та һала. Артабан кәстрүлде духовкаға ҡуйырға. Шулай уҡ икмәк бешеп сыҡҡандан һуң мейескә лә тығырға мөмкин. Ошондай ысул менән әҙерләнгән сыр оҙаҡ һаҡлана, боҙолмай. Тәмле лә, туҡлыҡлы ла.

Иғтибар! Сырҙы мотлаҡ эмалле һауытта эшләргә тырышығыҙ. Алюминдә уның тәме үҙгәрә.

Аштарығыҙ тәмле булһын! Көткән малығыҙҙың бәрәкәтен күрергә яҙһын!

Ыуыҙ һөтөнә бәйле ырымдар, йолалар:

- Орғасы йәки үгеҙ быҙау алырға ниәтләгәндәр, ир йәки ҡыҙ балаға ыуыҙ эсереп теләк теләгәндәр.

- Диета тотоусыларға аҙлап ҡына ыуыҙ биргәндәр. Ул әкренләп билдәләнгән нормаға еткерелә.

- Яңы тыуған малға тыуғандың беренсе сәғәтендә ыуыҙ һөтө эсерелә. Был быҙауҡайға аяҡҡа баҫырға ярҙам итә.