Фәйзи Ғәскәров исемендәге дәүләт ансамбле «Урал һәм Шүлгән» спектакленең премьераһын ҡуйҙы

Фәйзи Ғәскәров исемендәге дәүләт ансамбле «Урал һәм Шүлгән» спектакленең премьераһын ҡуйҙы

Өфөлә «Урал Батыр» эпосы буйынса «Урал һәм Шүлгән» бейеү спектакленең премьераһы булды. Был - Фәйзи Ғәскәров исемендәге дәүләт академия халыҡ бейеүҙәре ансамбле тарихында ғына түгел, республиканың мәҙәни тормошонда ла тәүге хореографик спектакль.

Ижади төркөм спектаклде ҡуйыуға әҙерлектең нисек барғаны хаҡында бына һөйләне:

 - Алдымда ябай булмаған бурыс торҙо. Бейеүҙән спектакль ҡуйырға. Ундай тәжрибәм юҡ ине. Сөнки театр актерҙары ваҡиғаларҙы  һәм образды һынландырыу өсөн  һүҙҙәр менән  эш итә.  Бында миңә хореография телен өйрәнергә тура килде. Ошо йәһәттән миңә проект авторы Йәмилә Бикбаева ярҙам итте. Минең өсөн яңы һәм ҡыҙыҡлы тәжрибә был, - тине спектакль режиссеры Фирғәт Ғарипов.

Йәмилә Бикбаева, проект авторы һәм балетмейстеры:

- Яңғыҙ бейеү ҡуйғанда ансамбль миңә ошо теманы үҫтерергә һәм спектакль ҡуйырға тәҡдим итте. Был проекттың үҙенсәлеге шунда: ул ансамбль тарихында тәүге хореографик спектакль. Һәм мин дә беренсе тапҡыр бындай жанрҙа эш алып барҙым. Бейеүселәргә актёр булырға тура килде. Командабыҙ бик шәп, шуға күрә, еңел булмаһа ла, алдыбыҙға ҡуйған бурысты атҡарып сыға алдыҡ шикелле.

Актерҙар ҙа яңы сәхнә әҫәре өҫтөндә эшләүҙән алған тәьҫораттары менән уртаҡлашты.

 - Минең өсөн был күптән көтөлгән ваҡиға. «Урал батыр» эпосының хореографик постановкаларҙың репертуарына эләкмәүе күптән борсой ине. Ошо ролде тыуҙыра алыуыма шатмын һәм ғорурланам. Был бик ҙур яуаплылыҡ, тырышып әҙерләндек, сәхнәгә сығыуҙы тулҡынланып көтәбеҙ, - тине Урал ролен уйнаған Айбулат Баһауетдинов.

Марат Яҡупов:

 - Премьераға ярты йыл элек әҙерләнә башланыҡ, ә һуңғы аҙналарҙа тығыҙыраҡ шөғөлләндек, репетициялар көн һайын барҙы. Минең өсөн Актерлыҡ тәжрибәһе бик ҡыҙыҡ булды. Бейеүсе булараҡ, театр атмосфераһын тойҙом,бик оҡшаны.

Хореографик спектакль өҫтөндә шулай уҡ сценарист Динара Ҡәйүмова, композитор Илшат Яхин, көйҙөң авторҙашы Вәсил Ғафаров, костюмдар буйынса рәссамдар Наталья Степанова һәм Сулпан Азаматова, график Ләйсән Ғарипова, Видеоинженер Руслан Юлтаев, яҡтыртыу буйынса рәссам Иван Федькин, алып барыусы Азамат Ғафаров эшләнеләр. Был  үҙенсәлекле проект Рәсәй халыҡтарының мәҙәни мираҫы йылына бағышланған.

https://vk.com/kulturarb