Күңел ҡанатын нығытып, осошҡа әйҙәй белеүсе

– Һаумыһығыҙ!.. Был донъяла тәүге көн генә йәшәгәндәй, ғәжәйеп йылы һаулыҡ һорашыуға кинәнеп ҡараным. Ул һүҙҙә ни тиклем үлсәүһеҙ наҙ, яҡтылыҡ йәшеренгәнен тойоу – күңел осошона тиң икән. Кешегә ҡанат үҫтерә белеүсе тылсым эйәләре тиһәм, сәйерерәк яңғырар, әммә заманыбыҙҙың илекһеү хәлдәре шауҡымында ошондай кешеләр менән күрешеп аралашыу – оло бәхет. – Һаумыһығыҙ!.. Ул шифаны бер миңә генә бүлеп бирмәне, ә көн һайын, инде биш тиҫтәгә яҡын йылдар бихисап тамашасыһына тарата. Донъяның иң сихәтле төҫ-биҙәктәрен сәхнәнән һирпә. Башҡортостандың халыҡ артисы Зифа Ғаяз ҡыҙы Баязитова ата-әсәһенән алған иғәнәтле, рәхимле күңел нурҙары менән бына ошолай ихлас уртаҡлаша белә, кешеләрҙе уйлы булырға саҡыра. Донъяға үҙ халҡы рухына ғашиҡ башҡорт ҡатын-ҡыҙы булып бағыуы – һоҡланыу уятып ҡына ҡалмай, уны иҫ киткес халыҡсан шәхес итеп таныта. Әҙәм балаһы холоҡто бәрәкәтле тыуған яҡ тәбиғәтенән дә ала, тиҙәр. Зифа Ғаяз ҡыҙы Баймаҡ районы Күсей ауылында тыуған. Тыуған тәбиғәтенең һәр матурлығын, үлән-сәскәһен, ағас-емешен һоҡланып күҙәтеүен тасуирлай белгән кеше ул. Шулай булмай ҙа, Күсей ғәжәйеп матур урында, Ирәндек тауҙарының Күсем ташы тапҡырында урынлашҡан. Бик матур ауыл! Бынан бер нисә быуат элек хәҙерге Бөрйән яҡтарынан килеп төйәк иткән Күсей исемле кеше был урындың йәшәр өсөн бик уңайлы булыуын белгән. Шишмәләре һыуы тәмле, шифалы, һауаһы ла тын юлдарын иркенәйтеп ебәргәндәй. Был төбәк Башҡортостанға һәм Рәсәйгә бик күп шәхестәр, оло талант эйәләре үҫтереп сығарған. Билдәле Бирғәле сәсән, мәшһүр ҡурайсы Хәмит Әхмәтов, хореограф, Башҡортостандың атҡаҙанған сәнғәт эшмәкәре Йәүҙәт Бикбирҙин, Советтар Союзы Геройы Тәфтизан Миңлеғолов, ғалим, «Әлифба» авторы Абдрахман Ғәлләмов, Башҡортостандың халыҡ шағиры Абдулхаҡ Игебаев, Башҡортостандың халыҡ яҙыусыһы Таңсулпан Ғарипова, Башҡортостандың халыҡ артисы Зифа Баязитова һәм башҡалар… Был исемлек тағы ла тулыланыуын дауам итә. Сөнки сәмләнеп, дәртләнеп йәшәгән халыҡ араһында битараф ҡалыу мөмкинлеге юҡ. Зифа Ғаяз ҡыҙының ата-әсәһе – уҡытыусылар, балаларын матурлыҡ, ғорурлыҡ, азатлыҡ рухы, аҡыл менән тәрбиәләй. Сөнки беҙҙең халыҡтың булмышы шундай, бүтәнсә булыуы мөмкин түгел. Ғаиләләге ете бала араһында бер Зифа апай сәнғәт юлын һайлай. Ҡалғандары – барыһы ла мәғариф өлкәһендә. Зифа Ғаяз ҡыҙы бала сағынан актриса булырға хыяллана. Элек, ауылға спектакль, йә концерт менән килгән артистарҙы йортҡа төшөрөү йолаһы булған. Шундай мәлдә Зифа апай әсәһен аптырашта ҡалдыра: бер кемдән рөхсәт алмай тороп, тота ла өйгә артистар алып ҡайта. Бәләкәй генә ҡыҙ балаға ышанып килеүсе ололарҙы әйт әле! Ял көнө кер сайҡатып йөрөүсе әсәһе, Сәкинә Кәлимулла ҡыҙы юғалып ҡалмай. Оло бүлмәгә табын йәйеп, ҡунаҡсыллыҡ күрһәтә. Тап ошонда, актерҙарҙың көҙгө алдына ултырып нисек гримм һалыуҙарын, артабан сәхнәгә сығыуҙарын, үҙҙәрен тотоштарына тиклем иҫе китеп күҙәтер була бәләкәй генә Зифа. Һуңынан, әхирәттәре алдында «сәхнә» ойоштора башлай. Бер ҡараһаң, бала саҡ шуҡлыҡтары ғына кеүек. Әммә тап ошо мәл уның күңелендә сәнғәт орлоғоноң барлыҡҡа килеү осоро булғандыр. Зифа Ғаяз ҡыҙы 1969–1973 йылдарҙа Өфө дәүләт сәнғәт институтының театр факультетында уҡый. Олег Ханов, Рәфил Нәбиуллин, Рафиға Ғәлина, Зилә Сәлишева, Риф Сәйфуллин, Гөлшат Зыязитдинова, Салауат Итбаев, Суфия Ҡорбанғәлиева, Анфиза Хафизова, Юнир Салауатов, Вәкил Йосопов, Хисмәтулла Дәүләтовтар менән бик татыу төркөмдә уҡый. Уларҙың берҙәмлеге, дуҫлығы бөгөн дә республикабыҙҙың сәнғәт өлкәһендәгеләрҙә һоҡланыу тыуҙыра. Ә Сибай театрына юллама менән бер юлы дүрт кеше – бөгөн инде Башҡортостандың халыҡ артистары Зифа Баязитова, Риф Сәйфуллин, Вәкил Йосопов һәм Башҡортостандың атҡаҙанған артисы Хисмәтулла Дәүләтов эшкә ебәрелә. Күп кенә ролдәрҙе бергә уйнарға, күп осраҡта партнер булырға тура килеүе – бер-береһен яҡшы белгән актерҙар өсөн еңелгә тура килә.