«Йәнле китап: Башҡортостан - Геройҙарҙың тыуған иле» проектының презентацияһы үтте

Бөгөн Әхмәтзәки Вәлиди исемендәге Милли китапханала «Йәнле китап: Башҡортостан - Геройҙарҙың тыуған иле» проектының презентацияһы һәм финалстарҙы бүләкләү тантанаһы  үтте. Башҡортостандың Китапханалар ассоциацияһы ҡаһарманлыҡтары хәҙерге быуын тормошона нигеҙ булған милли батырҙар тураһында өс комплект комикстар тәҡдим итә. Китаптарҙа башҡорттарҙың милли батыры Салауат Юлаев, генерал Миңлеғәле Шайморатов, партизан отрядтары командирҙары Даян Мурзин һәм Вафа Әхмәҙуллин хаҡында бәйән ителә. Комикстар баҫмаһының үҙенсәлеге шунда: улар артҡы тышлыҡтарһыҙ баҫылған: башта - башҡорт телендәге комментарийҙар менән һүрәттәр, аҙағынан - русса.
Башҡортостан китапханалары ассоциацияһының был проекты - гражданлыҡ йәмғиәте институттарын үҫтереүгә һәм социаль әһәмиәтле проекттарҙы тормошҡа ашырыуға йүнәлтелгән Башҡортостан Республикаһы Башлығы гранттары конкурсы еңеүсеһе. Комикстарҙың төп геройҙары образын талантлы карикатурасы Камил Буҙыҡаев һәм «Муха» студияһы рәссамдары уйлап тапҡан һәм төшөргән. Комикстар комплектының өсөһө лә «Башҡорт геройҙары» республика конкурсы финалсылары - балалар тыуҙырған художестволы образдар нигеҙендә әҙерләнгән.
Был конкурс «Башҡортостан Республикаһының Граждандар йәмғиәтенә булышлыҡ итеү фонды» ярҙамында БР Әхмәтзәки Вәлиди исемендәге Милли китапханаһы һәм Башҡортостан Китапханалары ассоциацияһы менән ойошторолған. Уның маҡсаты - һәләтле балаларҙы асыҡлау һәм уларға ярҙам итеү, Башҡортостан Республикаһы һәм уның геройҙары өсөн ғорурлыҡ һәм илһөйәрлек тойғоһо тәрбиәләү. Конкурсҡа бөтәһе 218 ижади эш ҡабул ителгән. Иң күп һүрәттәр Салауат Юлаевҡа арналған - 147 бала герой образын төшөргән. Конкурс еңеүселәре «Салауат Юлаев - беҙҙең геройыбыҙ» номинацияларында билдәләнде; «Генерал Шайморатов»; «Партизандар отрядтары командирҙары Даян Мурзин һәм Вафа Әхмәҙуллин». Шулай уҡ махсус дипломдарға лайыҡ булған ҡатнашыусылар ҙа билдәләнде. Еңеүселәргә проект тамамланғас, автографтар менән комикстың махсус баҫмаһы тапшырыласаҡ.