Салауатта киң билдәле рәссам Ренат Хәлиуллин Туймазы районының Киндек-Тамаҡ ауылынан. Һигеҙ йыллыҡ мәктәпте бөткәс, Өфө сәнғәт училищеһының һынлы сәнғәт бүлегендә, сәнғәт институтында белем ала. Буласаҡ рәссамға талантын үҫтереүҙә уҡытыусыһы Рәшит Нурмөхәмәтов ҙур йоғонто яһай. Һәм бына Ренат Хөснулла улы күп йылдар сәнғәт эшмәкәре. Күптән түгел ул “СВОИ» проекты авторҙарынан махсус хәрби операцияла ҡатнашыусыларҙың портреттарын төшөрөү тәҡдимен ала.
- Хәрби тема миңә яҡын, атайым Бөйөк Ватан һуғышын күргән кеше һәм, әлбиттә, бала сағым ветерандарҙың осрашыуҙары, уларҙың хәтирәләре, һуғыш тураһында фильмдар солғанышында үтте, малайҙар менән бөтә уйындарыбыҙ хәрби тематика менән бәйле ине. Беҙҙең быуын бөгөнгө йәштәрҙә булмаған илһөйәрлек менән һуғарылған тип уйлай торғайным. Әммә махсус операция бының улай түгеллеген, беҙҙә иле өсөн янып торғандар күплеген күрһәтте. Декабрь айында миңә һалдаттарҙың портреттарын эшләргә тәҡдим иттеләр, ҙур теләк менән эш башланым. Пенсионер булараҡ, мин ярҙам йөҙөнән машиналар алып, аҡсалар ебәрә алмайым, әммә мин портреттар төшөрә алам, үҙ ғүмерен хәүеф аҫтына ҡуйғандарға хөрмәт күрһәтә алам, - тип һөйләй Ренат Хөснулла улы.
Бөгөнгө көнгә рәссамдың өс портреты әҙер. Тәүге икәүһен - яҡташыбыҙ Радмир Ғималовтың һәм Мәләүез районы егете Илдар Кәбировтың портреттарын Республика Хәрби дан музейында ойошторолған күргәҙмәгә ебәреп өлгөргән дә инде.
- Махсус рәүештә Радмирҙың портреты өсөн шундай позаны һайланым, был уның тыйнаҡлығын да, рух ныҡлығын да еткереү өсөн эшләнде. Был егеттең аяғының тубыҡтан аҫҡы өлөшө өҙөлгән, ә башының яртыһы тимер ярсыҡтары менән тулған, әммә уның күҙҙәренең нурын бер һынау ҙа һүндермәгән. Радмирҙың күкрәгендә наградалар. Был миҙалдар еңеү символдары ғына түгел, ә бөтә ауырлыҡтарға ҡарамаҫтан, кире ҡайта алыуы тураһында иҫкәртеү ҙә. Илдар ҙа шулай уҡ махсус хәрби операция биләмәһендә ике аяғын ҡалдырып ҡайта. Иң үкенеслеһе, улар икеһе лә йәштәр һәм беҙ шундай кешеләргә хөрмәт күрһәтергә бурыслыбыҙ. Ҡулдарын ҡыҫып, уларға ярҙам итеп, рәхмәт әйтергә кәрәк, - тип уртаҡлаша рәссам.
Ренат был геройҙарҙын фотонан ҡарап төшөрә, яугирҙарҙың үҙҙәре менән дә осраша.
- Минең өсөн портретымды төшөрөү көтөлмәгән хәл булды. Ренат Хөснулла улы менән танышып, аралаштыҡ, килеп мине фотоға төшөрҙө. Беләһегеҙме, мин уға осрашыуҙың тәүге минуттарынан уҡ ышандым һәм әҙер эште күргәс, аптырап ҡалдым - бик тәбиғи килеп сыҡҡан. Ул минең тышҡы ҡиәфәтемде генә түгел, күҙҙәремдә сағылған эске тормошомдо ла еткерә алған, - ти һөйләй Радмир Ғималов.
Рассамдың өсөнсө эше ҡалабыҙҙан тәүгеләрҙән булып һәләк булған Линар Ғариповҡа бағышланған.
- Линарҙың ата-әсәһе миңә бер нисә фото ебәрҙе һәм материалды ентекле тикшергәндән һуң, ошо вариантта туҡталдым. Фотола Линар хәрби училище курсанты, уның күҙҙәре йәшлек дәрте һәм хеҙмәткә ынтылыш менән тулы. Әммә картинаны төшөрөү процесы еңелдән булманы: миңә уның йөҙөн бер нисә тапҡыр яңынан яҙырға тура килде - йә күләгәнең төшөүе, йә төҫтәр ҡәнәғәтләндермәй. Мин йәшлек менән батырлыҡтың бер бөтөн булған мәлен һүрәтләргә тырыштым. Уның ҡаҙаныштарын һыҙыҡ өҫтөнә алыу өсөн, курсант погондары урынына лейтенант званиеһын һүрәтләнем, сөнки махсус хәрби операция барышында уның был званиеһы була. Артҡы фон өсөн флагыбыҙҙы һәм, әлбиттә, Линарҙың күкрәгенә наградаларын өҫтәнем, - тип һөйләй Ренат Хәлиуллин.
Проект авторҙарының идеяһы буйынса, күргәҙмә тамамланғас, ижад ителгән эштәр һәләк булған яугирҙарҙың ғаиләләренә һәм һалдаттарға иҫтәлеккә тапшырыласаҡ. Бөгөн акция яңы үҫеш ала бара, күптән түгел федераль проектҡа тағы бер яҡташыбыҙ Светлана Ильина ҡушылып киткән.
Әйтергә кәрәк, Салауатта ла ошондай проект асыу планлаштырыла. Ҡала рәссамдары һәр шәмбе һайын яугирҙар менән картиналар галереяһында осрашасаҡ. Ижади мөхиттә аралашыу мәлендә оҫталар яугирҙарҙың йөҙҙәренең һыҙымдарын эшләп алып ҡаласаҡ, ә аҙаҡ эштәрен тамамлап ҡуясаҡ.