"Бала саҡтан сәнғәткә ынтылдым"

– Эйе, Сибай сәнғәт колледжында III курста башҡорт эстрадаһында йырлай башлағайным. Аранжировкалар эшләп, йырҙар яҙҙырып, эшләтеп. Өфөгә килеп, клубтарҙа, концерттарҙа, осрашыуҙарҙа ҡатнаштым. “Йәшлек-шоу”ҙа III урын алғайным. “Улар” тигән төркөм төҙөп, өс егет дүрт йыр сығарып, ике клип төшөрөп өлгөрҙөк. Шунан төрлө сәбәптәр буйынса таралдыҡ инде. Шулай эстрадала ике-өс йыл йырланым.
–Нисек сәнғәт донъяһына килеүең тураһында һөйлә әле. Ҡайҙарҙа белем алдың, мәктәптә, моғайын, гел концерт, сараларҙа ҡатнашҡанһыңдыр. Спортсы ла булғанһың, ошолар тураһында һөйлә әле.

– Сәнғәт донъяһына тәүге аҙымдарым Сибай ҡалаһында балалар баҡсаһында башланды. Сәхнәлә үҫтем инде. Мәктәпкә төшкәс, линейкаларҙы алып бара торғайным, ҡурай түңәрәгенә йөрөй башланым, ун йәшемдә ҡурай буйынса музыка мәктәбендә уҡый башланым, йыр дәрестәрендә үҙемде күрһәттем, шиғырҙар ҙа ятлай инем. Ҡала конкурстарында урындар яуланым. Сәхнәне ярата инем. Шул уҡ ваҡытта спорт менән дә шөғөлләндем. Бер нисә йыл футбол уйнаным. Спорт мәктәбенә йөрөнөм, ҡала командаһы составында төрлө ярыштарҙа ҡатнаштым, Өфөлә, Мәләүез, Октябрьский ҡалаларында, республиканан ситтә лә Сибай ҡалаһының данын яҡланыҡ. Футболды ярата инем, футболсы булам, тип хыялланып йөрөгән мәлдәр ҙә бар ине. Әммә сәнғәт үҙенә нығыраҡ тартты, йәлеп итте. Сибай сәнғәт колледжында ҡурай буйынса остазым Нурғәле Мирғәле улы булды. Уҡытыусыларыма рәхмәтлемен.

–Милли йәштәр театрында ҡасандан эшләйһең? Ниндәй ролдәр башҡарҙың? Ни өсөн тормошоңдо театр менән бәйләргә булдың? Кемдәр уҡытты? Яңыраҡ "Колонсаҡ" фестивалендә "Бер ғүмер етмәй икән" спектаклен ҡараным, Малышты уйнағанда ниндәй хис-тойғолар кисерҙең? Ижадыңа Рәсәй кимәлендә баһа алдың, ошо образ өсөн “Икенсе пландағы иң яҡшы ир-егет роле” номинацияһында бүләкләндең. Ҡотлайбыҙ!
– Рәхмәт. Ни өсөн театр факультетын һайланыммы? Бейей ҙә, йырлай ҙа, ҡурайҙа ла уйнай инем, шиғырҙар уҡый инем, шул бөтә һәләттәрҙе ҡайҙа бергә туплап, нисегерәк файҙаланырға, кем булырға тигән уйҙар бар ине башымда. Ҡапыл театр иҫкә төшөп, актёр бөтә яҡтан да һәләтле, бар булырға тейеш, тип уйланым да, ролдәр башҡарғанда бейей ҙә, йырлай ҙа, ҡурайҙа ла уйнай алыр инем, тип, Өфө дәүләт сәнғәт институтының театр факультетына индем. Художество етәксеһе Таңсулпан Даһи ҡыҙы Бабичева, актер оҫталығын алып барған Римма Тәлғәт ҡыҙы Харисоваға рәхмәтлемен. 2022 йылда уҡыуҙы тамамлағас, Мостай Кәрим исемендәге Милли йәштәр театрына эшкә алдылар. Рөстәм Хәкимовҡа, Мәсәлим Күлбаевҡа, Рәфис Мөхәмәтдиновҡа миңә ышаныс күрһәткәндәре өсөн ҙур рәхмәт. Дүртенсе миҙгел инде театр донъяһына сумыуыма.
Эйе, “Ҡолонсаҡ” фестивалендә спектакль менән ҡатнаштыҡ, мин Малыш ролен башҡарҙым. Ул – йыйылма образ, яуызлыҡ, үлем теләмәгән, мөхәббәткә генә ышанған егет, шуныһы менән ул миңә ҡәҙерле, оҡшай.

–Хәйер, һин театр менән генә сикләнмәйһең? Быйыл "Байыҡ" телевизион бейеү конкурсында II урын алдың. Ғаиләгеҙҙә сәнғәт кешеләре, бейеүселәр, йырсылар бармы?
– Эйе, ысынлап та, быйыл “Байыҡ”та үҙемде бейеүсе булараҡ һынап ҡарарға яҙҙы. Былтыр октябрҙә Азамат Кәримов бер юбилярҙы ҡотлап, миңә бейеү ҡуйғайны, шул бейеү тик ятмаһын тип, ул ҡатнашырға тәҡдим итте. Башта икеләндем, үҙемде бейеүсе тип һанамайым бит инде, Сибайҙа уҡығанда “Сармат” бейеү ансамблендә бер-ике йыл бейенем дә шуның менән бөттө. Бейергә яратһам да практика юҡ ине. Ярай I турҙа ҡатнашам да төшөп ҡалырмын, тип уйлағайным, әммә жюри ағзалары актерлыҡ яғынан оҫта бейеһең, маладис, тип II турға үткәрҙе. Азамат ағай тағы яңы “Бейәһеҙ ҡарт” тигән шаян бейеү һалды, шуның менән II турҙа ла ҡатнашып, Гала-концертҡа үттем. Шулай итеп, “Байыҡ”та II урын яуланым. Һис тә уйламағайным шулай килеп сығыр тип. Рәхмәт тамашасыға, жюри ағзаларына миңә шундай баһа биргәндәре өсөн. Бик ҡыуаныслы булды.
Беҙҙең ғаиләлә сәнғәт кешеләре юҡ. Атайым мәрхүм дә, әсәйем дә ябай эштә эшләне. Нәҫелдә бар инде ул, данлыҡлы ҡурайсы Әҙеһәм Исҡужин миңә туған булып сыға. Өләсәйем әйтте.

– Һине "Сәләм" тапшырыуын алып барыусы булараҡ та беләбеҙ. Ваҡыт етәме? Телевидение театр сәхнәһенән нисек айырыла? Унда эшләү өсөн ниндәй сифаттар кәрәк?
– Эйе, “Cәләм”дә сентябрҙән эшләй башланым. Августа уның етәксеһе Наил Юнысов шылтыратып, беҙҙә кастинг бара, алып барыусылар кәрәк, видео төшөрөп ебәр әле, тигәйне. Шунда уҡ төшөрөп ебәрҙем, шунан студияға саҡырып, тикшереп ҡаранылар. Бер нисә көндән һинең менән эшләргә теләк бар, тинеләр. Әлбиттә, шатландым. Әммә тәүҙә икеләнеүҙәр ҙә булды, беҙҙең артист халҡы таң менән торорға яратмай. Спектаклдәр кисен генә булғас, шулай яйға һалынған бит. Уйлап, кешеләр менән кәңәшләшеп, эшләргә булдым. Хәҙер үкенмәйем, был – минең өсөн яңы тәжрибә, камераға ҡарап һөйләү ул, ысынлап та, театрҙан ныҡ ҡына айырыла, үҙенең әтнәкәһе бар. Өйрәнергә лә ваҡыт кәрәк булды. Хаталар аша ла үттем, шунһыҙ булмай. Наил ағай миңә ышанып, кәрәкле һүҙҙәр әйтеп, кәңәштәр биреп, башҡа хеҙмәткәрҙәр ҙә ҡанатландырып торҙо, бөтәһенә лә рәхмәтлемен. Хәҙер инде үҙемде иркенерәк, ышаныслыраҡ тоям. Оҡшай. Телевидениела эшләү өсөн камеранан ҡурҡмаҫҡа, күберәк уҡырға, телмәрҙе байытырға, ҡунаҡ менән һөйләшкәндә оялмаҫҡа, алдан тексты уҡып әҙерләнергә кәрәк. Һәр өлкәлә лә тәжрибә талап ителә, яйлап өйрәнәһең.

–Динислам Сафин кино актёры булараҡ та танылыу яулай. Үҙең төшкән фильмдар тураһында һөйләп үт әле. Ҡасан тәүге тапҡыр роль тәҡдим иттеләр, нисек ҡабул иттең? Һиңә ниндәй ролдәр бирәләр, геройҙарың оҡшаймы, уларҙың тормошҡа ҡарашы һинеке менән тап килмәгәндә уйнауы ҡыйын түгелме?
– Киноға төшөү миңә оҡшай, “Батырҙар ташы” фильмының режиссеры – Роман Поджидаев. Кинйә ролен башҡарҙым, был – төп ролде башҡарыу буйынса беренсе тәжрибәм, продюсер Зөһрә Бураҡаева ышанып тапшырҙы. Кино 2023 йылда төшөрөлгәйне, яңы экрандарға сыҡты. Унан алда “Шағир көндәлеге”ндә, Мәскәү студенттарының ҡыҫҡа метражлы фильмдарында, “Фәрзәнә көнбайышҡа бара” картинаһында эпизодтарҙа ҡатнаштым. “Атайсал” фильмында төп геройҙың улын уйнаным. Әлегә шуныһына ла шатмын. Кино сәнғәтендә үҫергә, ҙурыраҡ проекттарға ла сығырға теләк бар. Сөнки киноиндустрия миңә оҡшай, фильм төшөрөү процесы ҡыҙыҡ. Кастингтар булһа, ҡатнашырға уйлайым.

–Театр, сәнғәт һинең өсөн нимә ул?
– Театр, сәнғәт үҙемдең хис-тойғоларымды, уйлап йөрөгән уйҙарымды, әйтә алмаған һүҙҙәремде геройҙар аша еткергән майҙансыҡ. Ләззәт алған урыным, үҫеш урыным, яратҡан эшем. Бала саҡтан аҡса артынан йүгермәү, ә яратҡан эштә эшләү маҡсатым ине. Хәҙер инде үҙемде театрһыҙ күҙ алдына ла килтерә алмайым. Сәнғәт институтына тағы ла уҡырға индем. Студенттар менән уларҙың диплом спектаклдәрендә ҡатнашам, уҡытыусы булараҡ үҙемде һынап ҡарайым, төрлө тренингтар үткәрәм. Мостай Кәрим исемендәге 158-се башҡорт гимназияһында малайҙарға ҡурай түңәрәген алып барам. Режиссёрҙарға рәхмәтлемен. Рөстәм Хәкимов күп кенә ролдәр бирҙе. Илсур Ҡаҙаҡбаев ҡуйған “Ҡара һыуҙар” спектаклендә – Яҡуп ролен, “Аҡбуҙат”та Шүлгән ролен башҡарам.

– Йырсы булараҡ та үҫешәһеңме? Әле ниндәй пландар менән йәшәйһең?
– Спектаклдәр сығып торғас, йырҙары ла бар, “Ҡара һыуҙар”ҙа Башҡортостандың атҡаҙанған артисы Лилиә Исҡужина менән дуэт башҡарабыҙ. Уны яҙҙырып, клип эшләп сығарҙыҡ. Шунан дәртләнеп киттем, йырларға яратам, киләһе йылда йырҙар сығарырға әҙерләнәм. Әммә бер ваҡыт, мин йырсы түгел, тип бөтөнләй ташларға уйлағайным, йылдар үткәс, тағы ла үҙенә тарта, теләк булғанда эшләп ҡалғы килә. “Батырҙар ташы” фильмында бер өҙөк бар, унда “Бер алманы бишкә бүләйек” тигән йырҙы башҡарам.

– Уҡыусыларға ниндәй теләк-кәңәштәрең булыр?
– Тик тормаҫҡа, үҫешергә, алға ынтылырға, маҡсат менән йәшәргә, был тормошта үҙ юлыңды табырға. Бының өсөн үҙеңде һәр яҡтан һынап ҡарарға кәрәк. Төрлө ерҙә эшләп ҡарап, әһә, бында оҡшаны, тегендә оҡшаманы, тип һығымта яһап, үҙ юлыңды табырға мөмкин, минеңсә. Сөнки тота килеп әллә ҡайҙа уҡырға инһәң, шунан ғүмер буйы яратмаған эшеңдә эшләп, үҙеңде ыҙалатаһың. Яратҡан һөнәрең буйынса рәхәтләнеп белем алып, шул һөнәр буйынса эшләп китһәң, күңелеңә ятҡан эшең буласаҡ. Йәштәр тормошта үҙ тәғәйенләнешен тапһын һәм маҡсаттарына ирешеп, ҙур шәхес булып китһен.

– Ихлас яуаптарың өсөн рәхмәт, Динислам! Ижади үрҙәр теләйбеҙ, һиңә.

Эльвира ӘСӘҘУЛЛИНА әңгәмәләште.

""Йәншишмә гәзитенән.

Беҙҙең МАХ каналына https://max.ru/tamasharb ҡушылығыҙ!